پارتی و یەکێتی گفتوگۆ لەبارەی هەژماری من و پڕۆژەی ڕووناکی دەکەن

ئاڤا نیوز

 

ئەمڕۆ کۆبوونەوەیەکی پێنج کاتژمێری شاندی باڵای پارتی و یەکێتی لە سلێمانی بەڕێوەچوو، ئاڤا زانیویەتی شاندی تەکنیکی هەردوولا گفتوگۆی وردیان لەبارەی هەژماری من و پڕۆژەی ڕووناکییەوە کردووە. 

 

وێنە گەورەکە: کۆبوونەوەکانی پارتی و یەکێتی لەبارەی پێکهێنانی کابینەی نوێی حکومەتی هەرێمی کوردستان بەردەوامە، هەردوولایەن لەسەر زۆر بابەت و تەوەر گەیشتوونەتە ڕێککەوتن و لێکتێگەیشتن، ئەوەی ماوەتەوە دابەشکردنی پۆستەکانی حکومەت و هەردوولایەن کاندیدی خۆیان بۆ پۆستەکان دەستنیشان بکەن. 

 

زانیاریی بەدەستهاتوو: ئاڤا زانیویەتی لە کۆبوونەوەی شاندی تەکنیکی هەردوولایەن، گفتوگۆی وردیان لەسەر دوو پڕۆژە کردووە، ئەوانیش پرۆژەی ڕووناکی بۆ کارەبا 24 کاتژمێری و پرۆژەی هەژماری بۆ بە بانکیکردنی مووچەی مووچەخۆران.

 

-    ئەمەش بەو ئامانجەیە لەگەڵ پێکهێنانی حکومەت، هەردوو پڕۆژەکە بەخێرایی و بێ گرفت تەواو بکرێن و پاڵپشتی تەواوی یەکێتییان هەبێت.

-    ئاڤا ئەوەشی زانیوە، یەکێتی و پارتی ئەمڕۆ گفتوگۆیان لەبارەی دابەشکردنی پۆستەکان کردووە، بەڵام دابەشکردنی وەزارەتەکان یەکلانەکراوەتەوە، بڕیارە لە چەند ڕۆژی داهاتوودا جارێکی دیکە کۆببننەوە.

ئەمەش بزانە:  پێشتر تیمی هەژماری من ڕایگەیاند: لە سەرجەمی یەک ملیۆن سوودمەند تاوەکو ئێستا 732 هەزار فەرمانبەر و مووچەخۆر لە پڕۆژەی هەژماری من تۆمار کراون، 405 کارتی بانک دابەش کراون و  ئەم مانگە 313 هەزار مووچەخۆر مووچەکانیان لەڕێی پڕۆژەی هەژماری منەوە وەردەگرن.

لەلایەکی دیکەوە: مەسرور بارزانی، سەرۆکوەزیرانی کوردستان لەمیانی کۆبوونەوەی لەگەڵ باڵیۆزی نوێی ئەڵمانیا لە عێراق ڕایگەیاند؛ پێویستە حکومەتێکی بەهێز و یەکگرتوو لە نزیکترین کات و بەر لە هەڵبژاردنی پەرلەمانی عێراق پێکبهێبرێت کە بڕیارە مانگی 11ی ئەمساڵ بکرێت.