لە ڕۆژهەڵاتی كوردستان دەیان هاووڵاتی بەهۆی خواردنی قارچک ژەهراوی دەبن

ئاڤا نیوز

 

لە پارێزگای كرماشانی ڕۆژهەڵاتی كوردستان، ژمارەیەك هاووڵاتی بەهۆی خواردنی قارچكی بەهاری، ژەهراوی بوونە و كەسێكیش گیانی لەدەستداوە.

 

وێنە گەورەكە: لەگەڵ هاتنی وەرزی بەهار ژمارەیەك گژوگیا و بەرهەمی خۆڕسك دەڕوێن كە بەشێكیان جگە لە سوود و قازانجی زۆریان بۆ تەندروستیی مرۆڤ، ژەهراوین و دەبنە مەترسی بۆ سەر سەلامەتیی مرۆڤ.

 

لێدوانی فەرمی: ئاژانسی هەواڵی ئێرنای ئێرانی بڵاویكردووەتەوە، مەسعود قەلعە سەفیدی، بەڕێوەبەری فریاگوزاری و ڕووداوە لەناكاوەكان لە پارێزگای كرماشان ڕایگەیاندووە، لە سەرەتای وەرزی بەهارەوە تا ئێستا، لانیكەم 47 كەس بەهۆی خواردنی قارچكی كوێستانەكان، ژەهراوی بوونە و ماوەیەك لەمەوبەریش كەسێك لە شارۆچكەی داڵاهۆ بەم هۆیەوە گیانی لەدەستداوە.

 

زانیاریی زیاتر: سەرجەم ئەو هاووڵاتیانەی بەهۆی خواردنی قارچكی ژەهراوی، تەندروستیان تێكچووە، دوای وەرگرتنی چارەسەریی پزیشكی، دۆخی تەندروستییان باش بووەتەوە تەنها كەسێكیان نەبێت كە هێشتا لە نەخۆشخانە ماوەتەوە و لەژێر چاودێریی پزیشكیدایە.

 

زانیاریی زیاتر: ئەو بەرپرسەی پارێزگای كرماشان هۆشداریی دەدات لەوەی لە كۆی نزیكەی هەزاران جۆر قارچك، 100 جۆریان ژەهراوین و خواردنیان مرۆڤ تووشی مەترسی دەكات.