خانەنشینان دەتوانن کارتی بانکییان وەربگرنەوە

ئاڤا نیوز

لەم هەفتەیەدا زیاتر لە سێ هەزار خانەنشین کارتی بانکییان گەڕایەوە، بۆئەوەی لەڕێگەی ئەی تی ئێمەکانی پرۆژەی هەژماری من مووچە وەربگرن. بۆ وەرگرتنەوەی کارتی بانکی پێویستە کارتی زانیاری یان کارتی نیشتمانی لەگەڵ خۆیان ببەن. 

وێنە گەورەکە: ئەو خانەنشینانەی کە بەرواری لە دایک بوونیان لەنێوان ساڵانی 1920 تا 1940ـە، لە بانکی عەنکاوە کە دەکەوێتە سنووری پارێزگای هەولێر مووچە وەردەگرن، دەتوان کارتی بانکییەکانیان لە چوارچێوەی پڕۆژەی هەژماری من وەربگرنەوە بۆ ئەوەی لە مانگەکانی داهاتوو مووچە بە ئاسانترین شێوە و کەمترین ماندووبوون وەربگرن.

ئەوەی پیویستە بیزانیت: ئەو خانەنشینانە پێویستە هەریەک لە بەڵگەنامەکانی کارتی نیشتیمانی یان کارتی زانیاری لەگەڵ خۆیان ببەنە بانکی عەنکاوە، لەوێشەوە تیمەکان کارتەکانیان پێدەدەنەوە لە کاتژمێر (8:30) بەیانی تا کاتژمێر (2:30)ـی پاش نیوەڕۆ بانکەکە کراوەیە.

زانیاریی پەیامنێر: هیشام سەعید، پەیامنێری ئاڤا میدیا قسەی لەگەڵ چەند خانەنشینێک کردووە، سەبارەت بە وەرگرتنەوەی کارتەکانیان و سوودمەند بوونیان، یەکێک لە خانەنشینەکان کە پیاوێکی تەمەن 81 ساڵە، دەڵێت: پێشتر بە سەرما و گەرما دەبوو لەبەردەم دەرگای بانک نۆرە بگرین تا مووچەکانمان وەردەگرت، بەڵام ئیدی لەمە بەدواوە مێشکمان ئارامە و هیچ خەممان نییە، بەکارتەکەمان بەچەند خولەکێکی کەم مووچەکانمان وەردەگرین. 

ئەمەش بزانە: پڕۆسەی تۆمارکردن و پێدانەوەی کارتی بانکیی خانەنشینان ڕۆژ بە ڕۆژ لە فراوانبوون دایە و ئێستاش  لە بانکی عەنکاوە سێ هەزار و 337 کارتی بانکی دەدرێتە ئەو خانەنشینانەی لەدایکبوونیان لەنێوان 1920 تا 1940ـە، لەداهاتووێکی نزیکیشدا خانەنشینانی بانکەکانی دیکەی کورستانیش بەپێی ڕیزبەندی بەرواری لەدایک بوونیان ئەو کارتە وەردەگرنەوە.

خانەنشینێک: بەکارتەکەمان بەچەند خولەکێکی کەم مووچەکانمان وەردەگرین