هاوردەکردنی 11 بەرهەمی کشتوکاڵی قەدەغە دەکرێت

ئاڤا نیوز

 

وەزارەتی کشتوکاڵی عێراق قەدەغەکردنی هاوردەکردنی 11 بەرهەمی کشتوکاڵی ڕاگەیاند، ئەم بڕیارە لە چوارچێوەی سیاسەتی نوێی هاوردەکردندا دێت کە پشت بە "ساڵنامەی کشتوکاڵی" دەبەستێت لە پێناوی پاڵپشتییکردنی بەرهەمی خۆماڵیی.

 

وێنە گەورەکە: پشت بەستن بە بەرهەمی ناوخۆ و کەمکردنەوەی هاوردە، ستراتیژێکی ئابوورییە بۆ بەهێزکردنی کەرتی کشتوکاڵی لە وڵاتدا و دابینکردنی سەقامگیری خۆراک بۆ خەڵک، ئەم جۆرە بڕیارانە، کاریگەرییەکی ئەرێنی لەسەر جووتیاران و ئابووری گشتی دروست دەکەن، هاوکات دڵنیایی دەدەن بۆ بەردەستبوونی خۆراک بە نرخێکی گونجاو.

 

لێدوانی فەرمی: مەهدی قەیسی، ڕاوێژکاری وەزارەتی کشتوکاڵ، بە ئاژانسی فەرمی دەنگوباسی عێراقی ڕاگەیاند، "سیاسەتی هاوردەکردن پشت بە ساڵنامەی کشتوکاڵی دەبەستێت کە بەردەوام نوێدەکرێتەوە بەگوێرەی زۆری و کەمی بەرهەمی ناوخۆ، بۆ دڵنیابوون لە بەردەستبوونی بەرهەمەکان و ڕێگریکردن لە بەرزبوونەوەی نرخەکان." ئاماژەی بەوەشدا، "دوایین نوێکردنەوەی ساڵنامەکە قەدەغەکردنی هاوردەکردنی 11 بەرهەمی لەخۆگرتووە".

 

ئەوەی ئێستا ڕوودەدات: قەیسی ڕوونیکردەوە، قەدەغەکردنەکە "بەرهەمەکانی چەوەندەر، شێلم، خاس، قەڕنابیت، کەلەرم، کولەکە، باینجان، پەتاتە، جگە لە هێلکەی خواردن، مریشک و هەنگوین و خورما"ی گرتووەتەوە. ئاماژەی بەوەشدا، ئێستا هاوردەکردنی تەماتە ڕێگەپێدراوە، بەڵام "لەوانەیە دواتر قەدەغە بکرێتەوە بەپێی دۆخی بەرهەمی ناوخۆ."