مەزڵووم عەبدی و بەرهەم ساڵح پرسی ئاوارەکانی ڕۆژئاوای کوردستان تاوتوێ دەکەن

ئاڤا نیوز

مەزڵووم عەبدی، فەرماندەی گشتیی هێزەکانی سووریای دیموکرات (هەسەدە) لەگەڵ بەرهەم ساڵح، کۆمیسیاری باڵای نەتەوەیەکگرتووەکان بۆ کاروباری پەنابەران لە ئەڵمانیا کۆبوونەوە و پرسی ئاوارەکانی عەفرین و کۆبانێیان تاوتوێ کرد.

چیرۆکی سەرەکی: کۆنفراسی ئاسایشی میونشن، ڕۆژی هەینی دەستیپێکردووە و تاوەکو 15ـی مانگ بەردەوام دەبێت. شاندی هەسەدە و ئیدارەی خۆسەری ڕۆژئاوای کوردستان هاوشان لەگەڵ حکومەتی دیمەشق بەشداری کۆنفرانسەکە دەکەن، ئەمڕۆ شاندەکەی خۆسەر بە سەرۆکایەتیی مەزڵووم عەبدی لەگەڵ کۆمیسیاری باڵای نەتەوەیەکگرتووەکان بۆ کاروباری پەنابەران کۆبووەوە.

بڵاوکراوەی فەرمی: مەزڵووم عەبدی لە تۆڕی کۆمەڵایەتیی "ئێکس" ڕایگەیاند: پێزانینی قووڵم دەربڕی بۆ هەوڵە بەرچاوەکانی کۆمیسیاری باڵای کاروباری پەنابەرانی سەر بە نەتەوە یەکگرتووەکان لە پشتیوانیکردنی پرسی ئاوارەکان کە بەهۆی شەڕەکانی ئەم دواییە ئاوارە بوون و لە پێشخستنی هاوکاری مرۆیی و سەقامگیری لە ناوچەکەدا.

لەلایەکی دیکەوە: لە پەراوێزی کۆنفرانسەکەدا، شاندەکەی خۆسەر بە هاوبەشی لەگەڵ ئەسعەد شەیبانی، وەزیری دەرەوەی سووریا کۆبوونەوەیەکیان لەگەڵ میر فەیسەڵ بن فەرحان، وەزیری دەرەوەی سعوودیە ئەنجامدا، لایەنی سعوودی پشتیوانی خۆی بۆ ڕێککەوتنەکەی هەسەدە و دیمەشق دەربڕی.