هاوسەرۆكی پەیەدە: بۆ پاراستنی مافەكانی كورد لە دەستووری سووریا داوای گەرەنتیی نێودەوڵەتی كراوە

ئاڤا نیوز

هاوسەرۆكی پەیەدە، لەبارەی بەشداریكردنی هەریەك لە مەزڵووم عەبدی و ئیلهام ئەحمەد لە كۆنفرانسی ئاسایشی میونشن، تایبەت بۆ ئاڤا زانیاریی نوێ دەخاتەڕوو. دەڵێت: گەرەنتیكردنی ماف و داخوازییەكانی كورد لە دەستووری نوێی سووریادا لەسەر ئاستی سەرۆك و بەرپرسانی باڵای وڵاتانی جیهان باس كراوە و داوای زەمانەتیش لە حكومەتی سووریا كراوە بۆ پابەندبوونی بە ڕێككەوتنەكانی لەگەڵ كورد.

چیرۆکی سەرەکی: ڕۆژی هەینی کۆنفرانسی ئاسایشی میونشن، لە ئەڵمانیا دەستی بەکارەکانی کرد، هەر یەک لە مەزڵووم عەبدی، فەرماندەی گشتیی هەسەدە، ئیلهام ئەحمەد، بەرپرسی پەیوەندییەکانی ئیدارەی خۆسەر بەشدار بوون و چەندین کۆبوونەوە و گفتوگۆیان لەگەڵ بەرپرس و سەرکردە باڵاکانی جیهان کردووە.

لێدوانی فەرمی: فەرحان داود، هاوسەرۆكی پەیەدە تایبەت بۆ ئاڤا ڕایگەیاند، چوونی مەزڵووم عەبدی و ئیلهام ئەحمەد بۆ ئەڵمانیا و بەشداریكردنیان لە كۆنفرانسی ئاسایشی میونشن، بە بانگهێشتنامەی فەرمی بووە، بەمەبەستی گفتوگۆكردن لەبارەی چارەسەریی ڕیشەیی كێشەكانی كورد و حكومەتی نوێی سووریا، بەتایبەتیش جێبەجێكردنی سەرجەم خاڵەكانی ڕێككەوتنامەی ئەم دواییەی نێوان هەسەدە و دیمەشق.

هاوسەرۆكەكەی پەیەدە باسی لەوەشكرد، لەمیانی كۆنفرانسەكە، سەركردەی وڵاتان ستایشی هەردوولایان كردووە لەبەرامبەر ئەوەی تا ئێستا ڕێككەوتنەكە بە باشی جێبەجێ دەكرێت و گفتوگۆكانی نێوان كورد و حكومەتی سووریا بە ئاراستەیەكی ئەرێنی دەڕوات.

بابەتە ستراتیژییەكە: لە كۆنفرانسی ئاسایشی میونشن، بەتایبەت باسی نووسینەوەی دەستووری نوێی سووریا كراوە، تەنانەت هۆكاری سەرەكیی بانگهێشتكردنی ئەسعەد شەیبانی، وەزیری دەرەوەی سووریا و مەزڵووم عەبدی، فەرماندەی گشتیی هەسەدە بۆ گفتوگۆكردن بووە لەبارەی دەستووری داهاتووی سووریا، لەو چوارچێوەیەشدا مەزڵووم عەبدی لەگەڵ سەركردە و بڕیاربەدەستانی وڵاتان لەنێویشیاندا نێچیرڤان بارزانی، سەرۆكی هەرێمی كوردستان گفتوگۆی كردووە، لەو دیدار و گفتوگۆیانە عەبدی داوای گەرەنتیی نێودەوڵەتی كردووە بۆ پاراستنی مافەكانی كورد وەكو نەتەوە و سەرجەم پێكهاتەكانی دیكەی سووریا لە چوارچێوەی دەستوورێكی هەمیشەیی، بۆ ئەمەش حكومەتی نوێی سووریا و خودی ئەحمەد شەرع، سەرۆكی سووریا ئامادەیی نیشانداوە، بڕیاریشە شاندێكی باڵای كورد بۆ گفتوگۆكردن لەسەر داڕشتنی بەند و بڕگەكانی دەستوور، سەردانی دیمەشق بكەن، بەڵام هێشتا كاتەكەی دیاری نەكراوە.

زانیاریی زیاتر: خاڵێكی دیكەی گرنگ، باس لە واژۆكردنی ڕێككەوتنێكی نوێی سیاسی و ئەمنی لەنێوان كورد و دیمەشق دەكرێت، جیا لەو ڕێككەوتنانەی پێشتر كراون، بەمەبەستی بەڕێوەبردنی دۆسیەی ئەمنی و سەربازی، لەو چوارچێوەیەشدا پەیامنێری ئاڤا لە قامیشلۆ قسەی لەگەڵ بەرپرسانی سەربازیی هەسەدە كردووە و زانیویەتی، هێزەكانی توركیا لە سەرێ كانی دەكشێنەوە، هێزەكانی ئاسایشی ناوخۆی ڕۆژئاوای كوردستان كە ئێستا بە وەزارەتی ناوخۆی سووریا دەبەسترێتەوە، پاراستنی ئەمنییەتی سەرێ كانی پێ بسپێردرێت، بەو مەرجەی ئەو هێزەی لەوێ جێگیر دەكرێت؛ هێزێكی تێكەڵ لە هەسەدە و سوپای عەرەبی سووری بێت و بە هاوبەشی بەڕێوەی ببەن.