عێراق سەرەخۆشی لە ئێران دەکات

ئاڤا نیوز

حکومەتی عێراق بەهۆی تەقینەوەکەی بەندەر عەباسەوە سەرەخۆشیی لە حکومەت و گەلی ئێران دەکات و ئامادەیی خۆی بۆ هاوکاری کردن دەردەبڕێت.

چیرۆکی سەرەکی: ئەمڕۆ شەممە، تەقینەوەیەک لە بەندەری شەهید ڕەجائی لە شارۆچکەی بەندەر عەباس لە پارێزگای هورمزکان لە باشوری ئێران ڕوویدا، هەشت کەس گیانیان لەدەستدا و لانیکەم 750 کەس برینداربوون.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوێکدا ڕایگەیاند: کۆماری عێراق سەرەخۆشیی لە حکومەت و گەلی ئێران دەکات، دووپاتیشی دەکاتەوە لەم ساتە پڕ لە ئازارانەدا پشتیوانییان دەبین، هاوکات هاوسۆزی قووڵی خۆمان لەگەڵ کەسوکاری قوربانییەکان دەردەبڕین. ئامادەیی خۆمان دەردەبڕین بۆ پێشکەشکردنی هەر پشتگیرییەک لەپێناو کەمکردنەوەی کاریگەرییەکانی ئەو کارەساتە.

لەلایەکی دیکەوە: محەممەد شیاع سوودانی، سەرۆکوەزیرانی عێراق فەرمانی بە وەزیری ناوخۆ کردووە پەیوەندیی بە هاوتا ئێرانییەکەی بکات بۆ تاوتوێکردنی ڕووداوەکە و هاوکاریی خێرا پێشکەش بەو وڵاتە بکات.

زانیاریی زیاتر: بە فەرمانی محەممەد موحەدی، سەرۆکی داواکاری گشتیی ئێران لێکۆڵینەوەی دەستبەجێ و ورد لە ڕووداوەکە دەستیپێکردووە، لێکۆڵینەوەکە بەدواداچوون بۆ ئەوانەش دەکات کە لە ڕووداوەکە تێوەگلاون یان کەمتەرخەم بوون.