ئیسرائیل: هیچ پەیوەندییەکمان بە تەقینەوەکەی ئێرانەوە نییە

ئاڤا نیوز

 

بەرپرسانی سەربازی ئیسرائیل ئەو گومانانە ڕەتدەکەنەوە کە ئیسرائیل دەستی هەبوو بێت لە تەقینەوەکەی بەندەر عەباسی ئێران.

 

وێنە گەورەکە: ڕۆژی شەممە 27 – 4- 2025 لە بەندەر عەباس لە ئێران تەقینەوەیەکی گەورە ڕوویدا، بە پێی دواین ئامارە فەرمیەکانی ئێران تاوەکو ئێستا 25 کەس گیانیان لەدەستداوە و زیاد لە 800 کەس بریندار بوون و 4 کەسیش تاوەکو ئێستا بێسەروشوێنن، گەڕان و پشکنین و لێکۆڵینەوە لە سەر ڕووداوەکە بەردەوامە.

 

لێدوانی فەرمی: دوای دروستبوونی گومان لەسەر ئیسرائیل لە ئەگەری پیلانگێڕی دژ بە ئێران و بوون بە هۆکاری تەقینەوەکەی ئەو وڵاتە، بەرپرسانی سەربازی ئیسرائیل لە ڕاپۆرتێکی ڕۆژنامەی " مەعاریف" ی ئیسرائیلیدا ئەو گومان و تۆمەتانەیان ڕەتکردەوە سەبارەت بە پەیوەندی ئیسرائیل بە تەقینەوەکەوەی بەندەر عەباس و ڕایانگەیاند: " سوپای ئیسرائیل هیچ پەیوەندییەکی بە تەقینەوەکەی ئێرانەوە نییە."

 

ئەوەی پێویستە بیزانیت: ڕوودانی تەقینەوەکەی ئێران هاوکات بوو لەگەڵ سێیەم کۆبوونەوەی نێوان ئەمریکا و ئێران، پێشتریش ئێران ڕایگەیاندبوو، ئیسرائیل نیگەران و ناڕازییە بە دانوستاندنی نێوان تاران و واشنتن و بەکارهێنانی هێزی سەربازی بۆ یەکلاکردنەوەی ناکۆکییەکان بۆ واشنتن پێشنیاز کردووە.