سووریا بۆ هەسەدە: دابەشکاری خاکی سووریا لەژێر هەر ناوێک ڕەتدەکەینەوە

ئاڤا نیوز

سەرۆکایەتی کۆماری سووریا هۆشداری دەداتە هێزەکانی سووریای دیموکرات و ئاماژە بۆ ئەوە دەکات، بانگەشەکردن بۆ فیدراڵی و جێگیرکردنی واقیعێکی جیاواز لەسەر زەوی، بە شێوەیەکی ڕاشکاوانە پێچەوانەی ناوەڕۆکی ئەو ڕێککەوتنەن کە لە نێوان ئەحمەد شەرع و سەرکردایەتی "هەسەدە" کراو ئەم لێدوانانە هەڕەشە لە یەکپارچەیی وڵات و سەلامەتی خاکەکەی دەکەن.

وێنە گەورەکە: شەممە، 26-04-2025، کۆنفرانسی یەکڕیزی و یەکهەڵوێستیی کورد لە ڕۆژئاوای کوردستان، بە بەشداریی زیاتر لە 400 کەس دەستی پێکرد و بەگوێرەی ڕاگەیێنراوی کۆتایی، بەشداربووانی کۆنفرانسەکە دیدگایەکی هاوبەشی کوردیان پەسەند کرد وەک بەڵگەنامەیەکی دامەزرێنەر کە گوزارشت لە ئیرادەی بە کۆمەڵی و ڕوانگەیەکی لۆجیکی بۆ چارەسەرێکی دادپەروەرانە و هەمەلایەنە بۆ پرسی کورد لە چوارچێوەی سووریایەکی یەکگرتوودا.

ڕاگەێنراوی فەرمی: سەرۆکایەتی کۆماری سووریا لە ڕاگەیێنراوێکدا سەبارەت بە پێشهاتەکانی ڕێککەوتن لەگەڵ سەرکردایەتی "هەسەدە" ڕایگەیاند.

ڕێککەوتنی دوایی کە لە نێوان ئەحمەد شەرع و سەرکردایەتی "هەسەدە" ئەنجام درا، هەنگاوێکی ئەرێنی بوو بەرەو ئارامی و کرانەوە بۆ چارەسەرێکی نیشتمانی گشتگیر. بەڵام جووڵە و لێدوانەکانی دوایی سەرکردایەتی "هەسەدە"، کە بانگەشەی فیدراڵی و جێگیرکردنی واقیعێکی جیاواز لەسەر زەوی دەکەن، بە شێوەیەکی ڕاشکاوانە پێچەوانەی ناوەڕۆکی ڕێککەوتنەکەن و هەڕەشە لە یەکپارچەیی وڵات و سەلامەتی خاکەکەی دەکەن.

لەبەر ئەوە، ئەمانەی خوارەوە دووپات دەکەینەوە:

٠ ڕێککەوتنەکە هەنگاوێکی بەسوود دەبێت ئەگەر بە ڕۆحێکی نیشتمانی گشتگیر جێبەجێ بکرێت، دوور لە پڕۆژەی تایبەت.

٠ بە شێوەیەکی ڕوون هەر هەوڵێک بۆ سەپاندنی واقیعێکی دابەشکاری یان دروستکردنی قەوارەی جیا لەژێر ناوی فیدراڵی یان خۆبەڕێوەبردن بەبێ ڕێککەوتنی نیشتمانی گشتگیر ڕەت دەکەینەوە.

٠ یەکپارچەیی سووریا وەک خاک و گەل هێڵی سوورە، هەر پێشێلکردنێکی ئەمە بە دەرچوون لە یەکڕیزی نیشتمانی و دەستدرێژی بۆ سەر ناسنامەی سووریای یەکگرتوو دادەنرێت.

٠ نیگەرانی قووڵ دەردەبڕین لەو کردارانەی کە ئاماژە بە ئاڕاستەی مەترسیدار بۆ گۆڕانکاری دیمۆگرافی لە هەندێک ناوچە دەکەن، کە هەڕەشە لە پێکهاتەی کۆمەڵایەتی سووری دەکات و دەرفەتەکانی چارەسەری نیشتمانی گشتگیر لاواز دەکات.

٠ هۆشداری لە پەکخستنی کارکردنی دامەزراوەکانی دەوڵەتی سووری دەدەین لەو ناوچانەی کە "هەسەدە" دەسەڵاتی بەسەردا هەیە، سنووردارکردنی گەیشتنی هاووڵاتیان بە خزمەتگوزارییەکان و قۆرخکردن و بەکارهێنانی سەرچاوە نیشتمانییەکان لە دەرەوەی چوارچێوەی دەوڵەت، کە یارمەتی قووڵکردنەوەی دابەشبوون دەدات و هەڕەشە لە سەروەری نیشتمانی دەکات.

٠ سەرکردایەتی هەسەدە ناتوانێت خۆی بڕیاربەدەست بێت لە ناوچەی باکووری ڕۆژهەڵاتی سووریا، کە تێیدا پێکهاتە ڕەسەنەکان وەک عەرەب، کورد، مەسیحی و گروپەکانی دیکە پێکەوە دەژین. قۆرخکردنی بڕیار و نوێنەرایەتی هەر پێکهاتەیەک ڕەتکراوەیە، چونکە ئارامی و داهاتوو بەبێ هاوبەشی ڕاستەقینە و نوێنەرایەتی دادپەروەرانە بۆ هەموو لایەنەکان مسۆگەر نابێت.

٠ دڵنیایی دەدەین کە مافەکانی برایانی کورد، وەک هەموو پێکهاتەکانی گەلی سووری، لە چوارچێوەی دەوڵەتی یەکگرتووی سووریدا پارێزراو و دەستەبەرکراون، لەسەر بنەمای هاووڵاتیبوونی تەواو و یەکسانی لە بەردەم یاسادا، بەبێ پێویستی بە دەستێوەردانی دەرەکی یان سەرپەرشتی بیانی.

٠ بانگهێشتی هاوبەشانی ڕێککەوتنەکە دەکەین، بەتایبەت "هەسەدە"، بۆ پابەندبوونی ڕاستگۆیانە بە ڕێککەوتنە واژۆکراوەکە و پێشخستنی بەرژەوەندی باڵای نیشتمانی لەسەر هەر حیسابێکی بەرتەسک یان دەرەکی.

٠ لە کۆتاییدا، هەڵوێستی جێگیرمان دووپات دەکەینەوە کە چارەسەر لە سووریا تەنها سووری، نیشتمانی و گشتگیر دەبێت، پشت بە ویستی گەل دەبەستێت، پارێزگاری لە یەکگرتوویی وڵات و سەروەری دەکات و هەر جۆرێکی سەرپەرشتی یان هەژموونی دەرەکی ڕەت دەکاتەوە.