نەتانیاهۆ داوای هەڵوەشاندنەوەی ژێرخانی ئەتۆمی ئێران دەکات

 

ئاڤا نیوز

بنیامین نەتانیاهۆ، سەرۆکوەزیرانی ئیسرائیل خوازیارە بە تەواوەتی بەرنامەی ئەتۆمی ئێران بوونی نەمێنێت و پێداگری لەسەر ئەوە کرد کە هەر ڕێککەوتنێک لەگەڵ تاران دەبێ بەهەمان شێوە چارەسەری تواناکانی مووشەکی بالیستیکی ئێران بکات.

وێنە گەورەکە: وڵاتانی ڕۆژئاوا دەمێکە گومانیان لەسەر ئێران هەیە کە دەیەوێت پەرە بە توانای چەکی ئەتۆمی بدات، لە بەرامبەردا تاران بەردەوام ڕەتی دەکاتەوە و پێداگری دەکات کە بەرنامەکەی تەنها بۆ مەبەستی ئاشتیانەیە و دەیەوێت لەو ڕێگەیەوە وزە دابین بکات.

لێدوانی فەرمی: لە میانی وتارێکیدا لە قودس، بنیامین نەتانیاهۆ وتی، دەبێت تاران ژێرخانی ئەتۆمی هەڵبوەشێنێتەوە ئەمەش بەو واتایەی ئەو وڵاتە نابێت توانای پیتاندنی یۆرانیۆمی هەبێت. هەر ڕێککەوتنێک لەسەر ئاستی نێودەوڵەتی کە لەگەڵ ئێران بکرێت دەبێت موشەکی بالیستی ئەو وڵاتە لە خۆ بگرێت.