هاکان فیدان: سێ ڕێگا لەبەردەم پەکەکەدان و دەبێت یەکێکیان هەڵبژێرێت

ئاڤا نیوز

 

هاکان فیدان لە کۆنگرەیەکی ڕۆژنامەوانیدا ڕاگەیاند، پێویستە دەستبەجێ پەکەکە خۆی هەڵوەشێنێتەوە و چەک دابنێت، "چۆن داعش لە سووریا لە سیستەم دەرچوو، ئاواش دەبێت پەکەکە لە سیستەم دەربچێت".

  
چیرۆکی سەرەکی: هاکان فیدان، وەزیری دەرەوەی تورکیا سەردانی دەوحەی قەتەری کرد و لەگەڵ شێخ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەر کۆبووەوە، پەیوەندییە دووقۆڵییەکانی نێوانیان، کاری هاوبەش و پرسە نێودەوڵەتییەکانی وەک غەززە و سووریایان تاوتوێ کرد.  

لێدوانی فەرمی: فیدان لە کۆنگرەیەکی ڕۆژنامەوانیدا سەبارەت بە پرسی پەکەکە گوتی: "چۆن داعش لە سووریا لە سیستەم دەرچوو، ئاواش دەبێت پەکەکە لە سیستەم دەربچێت، ئینجا ئەوە یا بە ویستی خۆی بە" سوڵح بێت، یان بە ئاشتی لەو کارە دەردەچێت، یاخود بە ڕێگەیەکی دیکە  ئێمە دەریدەکەین".

 - پەکەکە پێویستە بەدەم ئەو بانگەوازە بێت، کە بۆی هەڵوەشاندنەوەی کراوە، دەستبەجێ خۆی هەڵوەشێنێتەوە و چەک دابنێت". 

 - چاوەڕێین پەکەکە ڕێگر نەبێت لە گەڕانەوەی ئاشتی بۆ خاکی تورکیا و ئاسایی بوونەوەی دۆخەکە، ئەگینا ئێمە ئیرادە و توانای ئەوەمان هەیە کە بەردەوام بین لە بەرەنگاربوونەوەی پەکەکە". 

لەلایەکی دیکەوە: فیدان باسی لەو ڕێککەوتنەی نێوان هەسەدە و ئیدارەی نوێی سووریا کرد و گوتی:  چاوەڕێین خاڵەکانی ڕێککەوتنەکە جێبەجێ بکرێت، " دەبێت خاکی سووریا لە تیرۆر پاک بکرێتەوە"، بەهیچ شێوەیەک رێگە نادەین یەک پارچەیی خاکی سووریا بکرێتە ئامانج.