20ـەمین خولی پەیمانگەی کادیرانی پارتی بەڕێوەدەچێت

ئاڤا نیوز

 

بەئامادەبوونی مەسرور بارزانی و نێچیرڤان بارزانی، جێگرانی سەرۆکی پارتی دیموکراتی کوردستان ڕێوڕەسمی 20ـەمین خولی پەیمانگەی کادیرانی پارتی بەڕێوەدەچێت و خولەکە بۆ ماوەی شەش مانگ بەردەوام دەبێت.

 

چیرۆکی سەرەکی: کاتژمێر 11:00ـی پێشنیوەڕۆی ئەمڕۆ سێشەممە، 29-04-2025، لە هۆڵی سەعد عەبدوڵڵا لە شاری هەولێر، ڕێوڕەسمی 20ـەمین خولی پەیمانگەی کادیرانی پارتی دەکرێت و بە دوو کۆرس 100 کادیری پارتی لەسەر ئاستی ناوچەکان خول دەبینن.

 

وێنە گەورەکە: پارتی دیموکراتی کوردستان بەمەبەستی پێگەیاندنی کادیران و ئاشناکردنیان بە گۆڕانکارییەکان لە ڕووی سیاسیی، ئابووری و کۆمەڵایەتی بۆ ئەوەی باشترین ڕایەڵە لەگەڵ جەماوەر دروست بکەن، پەیام و ئایدیای حیزب بە جەماوەر بگەیێنن، 100 قوتابی لە پلەی کارگێڕی ناوچەکانی پارتی دیموکراتی کوردستان بەشداری خولی پەیمانگەی کادیران دەکەن.

 

زانیاریی تایبەت: ئەم خولە بە دوو کۆرسی ئەکادیمی جیاواز کە هەر یەکەیان سێ مانگ دەخایەنێت و بۆ ماوەی شەش مانگ بەردەوام دەبێت، دواتر کادیرەکان ڕێوڕەسمی دەرچوون دەکەن و بڕوانامەیان پێدەدرێت.