پەیامێکی نوێ لە مەسرور بارزانییەوە لەبارەی هەناردەکردنەوەی نەوت

ئاڤا نیوز

 

ئەنجوومەنی وەزیرانی هەرێمی کوردستان لە کۆبوونەوەدایە و یەکێک لە تەوەرە سەرەکییەکانی کۆبوونەوەکەش گفتوگۆکردنە لەبارەی دەستپێکردنەوەی هەناردەی نەوتی کوردستان و لەمپەر و ئاستەنگەکانی.

 

وێنە گەورەکە: ئەنجوومەنی وەزیرانی هەرێمی کوردستان بە سەرپەرشتی مەسرور بارزانی و بە ئامادەبوونی قوباد تاڵەبانی کۆبوونەوەی ئاسایی هەفتانەی خۆی دەکات، لە کۆبوونەوەکەدا دوو تەوەری سەرەکی تاوتوێ دەکرێت، لە تەوەری یەکەمدا دوایین پێشهاتەكانی پەیوەندیدار بە گفتوگۆ و دانوستاندنەكانی تایبەت بە دەستپێكردنەوەی هەناردەكردنی نەوتی هەرێمی كوردستان گفتوگۆی لەبارەوە دەکرێت، تەوەری دووەمیش پەیوەستە بە چارەسەرکردنی کێشەیەکی خانەنشینان.

 

لێدوانی فەرمی: لەبارەی هەوڵەکان بۆ دەستپێکردنەوەی هەناردەی نەوتی کوردستان، پێشەوا هەورامانی، وتەبێژی حکومەتی هەرێمی کوردستان بە ئاڤای ڕاگەیاند، "تاوەکو ئێستا زیاتر لە هەشت کۆبوونەوە لە نێوان هەرێمی کوردستان و بەغدا و تیمەکانی هەردوولا کراون، هەندێک لە کۆبوونەوەکان لە بەغدا و هەندێکیشیان لە هەولێر بوون، ئێستا نزیکبوونەوەی باش هەیە لەنێوان هەولێر و بەغدا لە بابەتی هاتنی کۆمپانییایەکی ڕاوێژکاری بۆ هەڵسەنگاندنی پرۆسەی نەوتی کوردستان و دیاریکردنی تێچووی دەرهێنان و گواستنەوە".

 

زانیاریی زیاتر: پێشەوا هەورامانی ڕاشیگەیاند، لە کۆبوونەوەی ئەمڕۆی ئەنجوومەنی وەزیران سەرۆکوەزیران مەسرور بارزانی، تیمی حکومەتی هەرێمی کوردستانی ڕاسپارد کە بە هەموو شێوەیەک هاوکاربن بۆ دەستپێکردنەوەی هەناردەکردنی نەوتی کوردستان و گووتوویەتی، وەک چۆن لە ڕابردوودا ئێمە هۆکار نەبووین لە ڕاوەستانی هەناردەکردن، لە داهاتووشدا هۆکار نابین بۆ دەستپێنەکردنەوەی هەناردەی نەوت و هەموو ئاسانکارییەک دەکەین".