ئاگربەستی دیمەشق و هەسەدە درێژ کرایەوە

ئاڤا نیوز

 

بەگوێرەی ئاژانسی فرانس پرسێس، حکومەتی سووریا و هێزەکانی سووریای دیموکرات (هەسەدە) لەسەر درێژکردنەوەی ئاگربەست بۆ ماوەی یەک مانگ ڕێککەوتن، تاوەکوو پڕۆسەی گواستنەوەی حەوت هەزار زیندانیی داعش و یەکخستنی دامەزراوەکان تەواو بکرێت.

 

هۆکارە زانراوەکان: بەگوێرەی ئاژانسەکە، کە لە سەرچاوەیەکی حکومی لە سوریا وەری گرتووە؛ کە یەکێک لە هۆکارە سەرەکییەکانی درێژکردنەوەی ئاگربەستەکە، تەواوکردنی پڕۆسەی گواستنەوەی دەستگیرکراوانی داعشە. هاوکات سەرچاوەیەکی کوردیش ڕایگەیاند کە ئاگربەستەکە تا کاتی گەیشتن بە چارەسەرێکی سیاسی کە جێگەی ڕەزامەندی هەردوولا بێت، بەردەوام دەبێت.

 

ئەوەی پێویستە بیزانیت: هەرچەندە تائێستا هیچ ڕاگەیەندراوێکی فەرمی لە لایەن هەردوولاوە بڵاو نەکراوەتەوە، بەڵام چەند سەرچاوەیەک بە ئاژانسی "فرانس پرێس"یان ڕاگەیاندووە کە ئاگربەستەکە بۆ ماوەی مانگێک درێژ دەکرێتەوە.

 

- ئەم ئاگربەستە لە چوارچێوەی لێکتێگەیشتنێکی فراوانتردایە لەنێوان حکومەتی سووریا و هێزەکانی سووریای دیموکرات، کە تێیدا باس لە چۆنیەتی تێکەڵکردنی دامەزراوە کوردییەکانی پارێزگای حەسەکە بە دامەزراوە حکومییەکان دەکرێت. ئەم هەنگاوە دوای ئەوە هات کە هێزەکانی سووریای دیموکرات (هەسەدە) لە چەندین ناوچەی باکوور و ڕۆژهەڵاتی سووریا کشانەوە و سوپای سووریا لەو شوێنانە جێگیر بوو.

 

باکگراوند: دوای چەند ڕۆژێک شەڕ و پێکدانان، سێشەممەی ڕابردوو 20ـی کانوونی دووەم وەزارەتی بەرگریی سووریا ئاگربەستێکی چوار ڕۆژی ڕاگەیاند و هەسەدەش پابەندبوونی خۆی بە ئاگربەست ڕاگەیاند، کاتژمێر 8ـی ئێوارەی ئەمڕۆ شەممە وادەی ئاگربەستەکە تەواو دەبێت.