كاروانی چوارەمی هاوكارییەكانی دەزگای خێرخوازیی بارزانی بەرەو ڕۆژئاوای كوردستان بەڕێكەوت

ئاڤا نیوز

كاروانی چوارەمی هاوكارییە مرۆییەكانی دەزگای خێرخوازیی بارزانی كە لە نۆ بارهەڵگری پڕ لە خواردن و پێداویستی سەرەكی پێكهاتووە، بەرەو ڕۆژئاوای كوردستان بەڕێكەوت.

وێنە گەورەکە: لەگەڵ دەستپێكردنی شەڕ و ئاڵۆزییەكانی ڕۆژئاوای كوردستان، هەزاران خانەوادە لە كۆبانێ، سەری كانێ، ڕەققە و عەفرین ئاوارەبوونە و پەنایان بۆ قامیشلۆ و عامودێ هێناوە، ئێستا لە ڕەوشێكی نالەباری مرۆیی ڕۆژەكان بەڕێدەكەن. دەزگای خێرخوازیی بارزانی هەڵمەتێكی فراوانی بۆ گەیاندنی هاوكارییە مرۆییەكان بە خەڵكی ڕۆژئاوا دەستپێكردووە، بە دابینكردنی خواردن، سووتەمەنی، دەرمان و پێداویستیە سەرەكییەكان بۆیان.

لێدوانی فەرمی: د. ئیبراهیم سەمین، جێگری سەرۆكی دەزگای خێرخوازیی بارزانی تایبەت بە ئاڤا ڕایگەیاند، نۆ بارهەڵگر كە پێكهاتووە لە دۆشەك، بەتانی، مۆكێت، خواردن، شیری منداڵان و كەرەستەی پاككەرەوە بەرەو ڕۆژئاوای كوردستان بەڕێكەوت. دووپاتیشی دەكاتەوە، لەسەر ڕاسپاردەی سەرۆك بارزانی، لە گەیاندنی هاوكارییەكان بۆ خەڵكی ڕۆژئاوا بەردەوام دەبن.

٠ جێگری سەرۆكی دەزگای خێرخوازیی بارزانی وتیشی، جگە لەو نۆ بارهەڵگرە، لەماوەی چوار ڕۆژی ڕابردوودا، 67 بارهەڵگری پڕ لە كەلوپەل و شەش تانكەری گواستنەوەی نەوتی سپی ڕەوانەی ڕۆژئاوای كوردستان كراوە، هاوكات 13 بارهەڵگریش بۆ گواستنەوەی خێوەت بۆ نیشتەجێكردنی ئاوارەكان گەیشتوونەتە قامیشلۆ.

زانیاریی زیاتر: هەر لەچوارچێوەی گەیاندنی هاوكارییەكان، لەسەر فەرمان و ڕاسپاردەی سەرۆكوەزیران مەسرور بارزانی، بڕی 100 هەزار لتر نەوتی سپی لەڕێگەی شەش تانكەرەوە گەیێنراونەتە شاری قامیشلۆ؛ ئێستا دەستكراوە بە دابەشكردنی نەوتەكە بەسەر خانەوادە ئاوارەكان كە ڕوویان لە قامیشلۆ و عامودێ كردووە و هەر خانەوادەیەك بڕی 40 لتر نەوتیان پێدەدرێت.

٠ جێگری سەرۆكی دەزگای خێرخوازیی بارزانی وتیشی، 100 هەزار لتری دیكەی نەوت ڕەوانە دەكرێت بەڵام هێشتا ڕێككارەكانی دەروازەی سنووری بۆ گواستنەوەی سووتەمەنییەكە تەواو نەكراون.

لەلایەکی دیکەوە: ڕزگار عوبێد، سەرپەرشتی دابەشكردنی سووتەمەنی لە ڕۆژئاوای كوردستان بە ئاڤای وت، بۆ ڕۆژی چوارەم نەوتی سپی بەسەر خانەوادە ئاوارەكان دابەش دەكەین كە لە دۆخێكی خراپدان و سەرەڕای نزمبوونەوەی پلەكانی گەرما سووتەمەنیان نەبوو، ئەمڕۆش 300 خێزان لە وەرگرتنی نەوت سوودمەند دەبن و پرۆسەكەش بەردەوام دەبێت، سبەی هاوكارییە مرۆییەكان دەگەیێنینە حەسەكە و لە هەوڵیشداین بگەینە كۆبانی. 

٠ موسا ئەحمەد، سەرۆكی دەزگای خێرخوازیی بارزانی بە ئاڤای وت، هەر هاوكارییەك كە ئامادە دەكرێت، دەستبەجێ بە هاووڵاتیانی دەگەیەنین، ڕۆژانە دوو ژەمەخواردنی گەرم بۆ سەدان خێزانی ئاوارەی نیشتەجێی نێو مزگەوت و قوتابخانەکانی قامیشلۆ، عامودێ، دێرك و گرگێ لەگێ دابین كردووە، تەنانەت چەندین خێزان بەهۆی نەبوونی شوێن لەنێو ئۆتۆمبێلەكانیان ماونەتەوە و تیمەكانمان خواردن و هاوكاریی پێویستیان پێ گەیاندوون.

بەتەنیشت ئەم بابەتەوە: د. عەباس ئازاد سەرپەرشتیاری یەکەی پزیشکی لە دەزگای خێرخوازیی بارزانی بە ئاڤا میدیای وت، تیمە پزیشکییەکەی دەزگای خێرخوازیی بارزانی لە هەشت ئەمبوڵانس و دوو نۆرینگەی گەڕۆک پێکدێن، 25 پزیشک و یاریدەری پزیشک لەخۆدەگرێت، ماوەی سێ ڕۆژە گەیشتوونەتە قامیشلۆ، تائێستا چارەسەری پێویستیان بۆ نزیکەی 700 نەخۆش کردووە، بەردەوامیشن لە بینین و چارەسەرکردنی نەخۆش.