ڕووسیا هێرشی کردە سەر دوو شارەی گەورەی ئۆکرانیا

ئاڤا نیوز

 

دوای دەستپێکردنی دانوستانەکانی مۆسکۆ و کیێڤ بۆ ڕاگرتنی جەنگ، ڕووسیا هێرشێکی ئاسمانی کردە سەر دوو لە گەورەترین شارەکانی ئۆکرانیا.

 

چیرۆکی سەرەکی: ڕۆژی هەینی، ڕووسیا و ئۆکرانیا بۆ یەکەمجار چوونە سەر مێزی گفتوگۆ و تاوتوێی ڕاگرتنی جەنگیان کرد، ئەمڕۆیش دووەم ڕۆژی دانوستانەکان دەست پێ دەکات بەڵام بەرەبەیانیی ئەمڕۆ ڕووسیا هێرشی ئاسمانی کردە سەر شارەکانی کیێڤی پایتەخت و خارکیڤ، کە دوو گەورەترین شاری ئۆکرانیان. 

 

لێدوانی فەرمی: بەرپرسانی کیێڤ ڕایانگەیاندووە: هێرشە ئاسمانییەکەی ڕووسیا بووە هۆی مردنی کەسێک و 15 هاووڵاتیش بە سەختیی بریندار بوون، کە لە نێوانیاندا منداڵێک هەیە.

 

بۆچی گرنگە: هێرشەکانی ڕووسیا لە گەرمی دانوستان و گفتوگۆکانی نێوان هەردوو وڵات دێت، لەگەڵ ئەوەشدا ڕووسیا سووربوونی خۆی لەسەر گرتنی بەشێ ڕۆژئاوای ناوچەی دۆنباس دووپات دەکاتەوە، بەو شێوەیەش گومان لە ڕژدی مۆسکۆ دەکرێت سەبارەت بە ڕاگرتنی جەنگەکە. 

 

کاریگەری و لێکەوتەکان: هێرشەکەی بەرەبەیانیی ئەمڕۆی ڕووسیا بۆسەر ئۆکرانیا، قەیرانی وزەی لەو وڵاتە قووڵتر کردەوە و ڤیتالی کلیتچۆ، سەرۆکی شارەوانی کیێڤیش دەڵێت: بەهۆی ئەو هێرشانەوە هەزار و 940 باڵەخانەی نیشتەجێبوون بەبێ وزەی گەرمی و کارەبا ماونەتەوە، لەگەڵ ئەوەشدا زیاتر لە 600 هەزار کەس شاری کیێڤیان جێهێشتووە.