دیندار زێباری: پابەندی جێبەجێكردنی ڕاسپاردە نێودەوڵەتییەكانین بۆ ماف و ئازادییەكان

ئاڤا نیوز

ڕێكخەری ڕاسپاردە نێودەوڵەتییەكان ڕایدەگەیەنێت، وڵاتان ستایشی هەوڵەكانی حكومەتی هەرێمی كوردستان دەكەن بۆ جێبەجێكردنی سەرجەم ئەو ڕاسپاردانەی لە خولی گشتگیر لە جنێڤ، ئاراستەی عێراق و هەرێمی كوردستان كران، پەیوەست بە پرسەكانی مافی مرۆڤ، پاراستنی مافی پێكهاتە ئایینی و نەتەوەییەكان، بەشداریی كارای ئافرەتان لە كایەی دەوڵەت و بڕیاردان.

چیرۆكی سەرەكی: ڕۆژى چوارشه‌ممه 7-5-2025، ‌ستیڤن بێتنەر، کونسوڵی گشتیی ویلایەتە یەکگرتووەکانی ئەمریکا لە هەولێر، پێشوازی لە ديندار زێباری، ڕێکخەری ڕاسپاردە نێودەوڵەتییەکان كرد. لە ديدارێکدا تیشک خرایە سەر چەند بابەتێکی پەیوەست بە ڕەوشی ماف و ئازادییەکان، وەک بەرەنگاربوونەوەی ماددە هۆشبەرەکان، پێشخستن و پاراستنی مافەکانی ئافرەتان، ئازادیی ڕادەربڕین، بەرەنگاربوونەوەی گوتاری ڕقوکینە و هەنگاوەکانی جێبەجێکردنی پلانی حکومەتی هەرێمی كوردستان بۆ مافەکانی مرۆڤ.

بابەتە ستراتیژییەكە: لە سەرەتای ئەمساڵ لەمیانی گفتوگۆكانی خولی 48ـی پانۆرامانی خولی گشتگیر 'UPR ' كە لە شاری جنێڤ بەڕێوەچوو، 96 وڵات، 279 ڕاسپاردەیان ئاراستەی عێراق و هەرێمی كوردستان كرد پەیوەست بە پاراستنی مافی پێکهاتە ئایینی و نەتەوەییەکان، بەشداريی کارای ئافرەتان لە کایەکانی دەوڵەت و بڕیاردان، ماف و ئازادییە گشتییەكان، بەگوێرەی نوێترین ڕاپۆرتی ساڵانەی وەزارەتی دەرەوەی ئەمریكا و ڕاپۆرتی كۆمیسیۆنی ئەمریكا بۆ ئازادیی ئایینی نێودەوڵەتی، هەرێمی كوردستان بووەتە ژینگەیەكی ئارام و شایستە بۆ پاراستنی پێكهاتە ئایینی و نەتەوەییەكان.

لێدوانی فەرمی: لەبارەی ڕاپۆرتە نێودەوڵەتییەکانی تایبەت بە ڕەوشی مافەکانی مرۆڤ، دیندار زێباری ڕایگەیاند: حکومەتی هەرێمی کوردستان بایەخێكی زۆر بە ڕاپۆرتی ڕێکخراو و لایەنە نێودەوڵەتییەکانی تایبەت بە ڕەوشی مافەکانی مرۆڤ دەدات، لەوانەش ڕاپۆرتی ساڵانەی وەزارەتی دەرەوەی ئەمریکا، سەبارەت بە ڕەوشی مافەکانی مرۆڤ و ڕاپۆرتی کۆمیسیۆنی ویلایەتە یەکگرتووەکانی ئەمه‌ریکا بۆ ئازادیی ئایینیی نێودەوڵەتی، لەم بوارەدا هەماهەنگی هەیە بۆ ئاڵوگۆڕی زانیاری، ئه‌م هه‌ماهه‌نگییه‌ش بووه‌ته‌ هۆی ئه‌وه‌ی كه‌ وێنه‌یه‌كی واقیعی له‌ باره‌ی ڕه‌وشی پێكهاته ئایینی و نەتەوەییە‌كان لە هەرێمی کوردستان بخرێتە ڕوو.