ترەمپ: هەوڵ دەدەم بەبێ بۆردوومان پرسی ئەتۆمیی ئێران چارەسەر بکەم

ئاڤا نیوز

 

دۆناڵد ترەمپ، سەرۆکی ئەمریکا، ڕایگەیاند لە هەوڵی ئەوەدایە کە بەبێ ئەوەی پێویست بە بۆردوومان کردن و هێرشی سەربازی هەبێت، پرسی ئەتۆمیی ئێران چارەسەر بکات.

 

لێدوانی فەرمی: ترەمپ سەبارەت بە دانوستانەکانی نێوان ئەمریکا و ئێران سەبارەت بە پرسی ئەتۆمیی ئێران گوتی؛ "بە ڕاستی من حەزم لە بۆردوومانکردنی ئێران نییە و دەمەوێت ئەوان زۆر سەرکەوتووبن."

زانیاریی زیاتر: ئەم لێدوانەی ترەمپ لە کاتێکدایە کە پێشتر ئەوە بڵاو کرابوویەوە کە ئیسرائیل بژاردەی ‌هێرشی سەربازی و بۆردوومانکردنی دامەزراوە ئەتۆمییەکانی ئێرانی پێ باشتر بووە، بەڵام ترەمپ ڕێگریی لە جێبەجێکردنی ئەو بژاردەیە کردووە و هانی گفتوگۆی داوە.

ئەمەش بزانە: ئەم لێدوانەی ترەمپ لە کاتێکدایە کە ئەمریکا و ئێران گفتوگۆیان دەستپێکردووە و تا ئێستا سێ جار، دوو جار لە مەسقەت و جارێک لە ڕۆما، کۆبوونەتەوە و بڕیارە لە کۆبوونەوە بەردەوام بن. بەڵام لەگەڵ ئەمەشدا ئەمریکا لە گوشارەکانی بۆ سەر ئێران، وەک سزادانی کەرتی نەوتیی ئەو وڵاتە بەردەوامە. 

ئەوەی پێویستە بیزانیت: هاوکات ترەمپ لە پلانیدا هەیە لە میانەی سەردانەکەی بۆ ڕۆژهەڵاتی ناوەڕاست کە سەردانی هەریەکە لە سعودییە و قەتەر و ئیمارات دەکات، ناوی کەنداوی فارس بۆ کەنداوی عەرەبی بگۆڕێت، کە ئەمەش ئێرانی نیگەران کردووە.