سەرۆکی دەستەی دەستپاکی: لە هەرێمی کوردستان 300 هەزار خانووی زێدەڕۆ هەبوو

ئاڤا نیوز

 

سەرۆکی دەستەی دەستپاکی باس لە پێویستی گۆڕانکاریی لە یاساکانی تایبەت بە زێدەڕۆیی دەکات و دەڵێت: لە ڕابردوودا 300 هەزار خانوو بە زێدەڕۆیی دروستکراون.

 

وێنە گەورەکە: لە هەرێمی کوردستان بەشێک لەو زەویانەی کە موڵکی حکومەتن، زۆرجار لەلایەن هاووڵاتیانەوە زێدەڕۆیان دەکرێتە سەر و بەبێ ڕێگەپێدان خانوو و شوێنی مانەوەی لەسەر دروست دەکەن، لایەنە پەیوەندیدارەکان بەردەوام لە هەوڵی ئەوەدابوون کە ئەو دیاردەیە بنبڕبکەن. 

 

لێدوانی فەرمی: حاکم ئەحمەد ئەنوەر، سەرۆکی دەستەی دەستپاکی لە هەرێمی کوردستان بە ئاڤا میدیای وت، ئەو زێدەڕۆییانەی هەن دوور لە سەنتەری شارەکان دەکرێن، ئەگەرچی یاسای زێدەڕۆیی ڕێکاری زۆر توندی تێدایە بۆ کەسانی زێدەڕۆکار، بەڵام هەندێ لە یاساکان پێویستیان بە هەموار هەیە. لە ڕابردوو 300 هەزار خانووی زێدەڕۆ لە هەموو هەرێمی کوردستان دروستکرابوون، بەشێکیان لەلایەن خەڵکی هەژار دروستکرابوون و بەشێکی دیکەیان بازرگانیان پێوە دەکرا.

 

حاکم ئەحمەد ئەنوەر لەسەر کەیسی زێدەڕۆیی ئەمانەشی وت:

-    زێدەڕۆیی لە کاتی بوونی شەڕ و نا ئارامی زیاد دەکات، لە ساڵی 1991ـەوە زێدەڕۆیی هەیە، بە تایبەت لە کاتی شەڕی داعش زێدەڕۆیی لە هەموو ناوچەکان زیادیکرد.

-    بەپێی یاسای ژمارە سێی ساڵی 2018 هەزاران خانووی زێدەڕۆ لەسەر خەڵک تاپۆ کران، بەڵام نەخشە ڕێگایەکی توند لەو یاسایە هەیە.

-    بەپێی یاساکە، کەسێک ئەگەر تەجاوزی کردبێت بە کەفالەتیش ئازاد ناکرێت تا زێدەڕۆییەکە هەڵنەگرێت.
-    لەسەر ئاستی جێبەجێکردنی بڕیارەکان دەستوەردان هەیە.