هەڵوێستی نەوەی نوێ لەبارەی پێکهێنانی بەرەی هاوبەش بۆ هەڵبژاردن

ڕاگەیێنراوی فەرمی: جوڵانەوەی نەوەی نوێ دەڵێت، سەرۆکی هاوپەیمانێتیەکە و تەواوی سەرۆک لیستەکان بە مافی خۆمان دەزانین، بەڵام ئامادەین دەستبەرداری بەشێک لەو مافەی خۆمان بین لە پێناو بەرژەوەندیی گشتی.

لە بەشێکی دیکەی ڕاگەیێنراوەکەیدا، نەوەی نوێ ڕوودەکاتە هێزەکانی دەرەوەی یەکێتیی و پارتی و دەڵێت، "ئەگەر پێتان وایە نەوەی نوێ دەبێتە کێشە بۆ هاوپەیمانێتیەکە، ئەوا هەمووتان دەتوانن پێکەوە هاوپەیمانێتیەکە دروست بکەن بە بێ نەوەی نوێ، ئێمەش لە دەرەوە پشتیووان و هاوکارتان دەبین."

نەوەی نوێ پێی وایە، "بە پێی دەنگ دەبوو سەرۆکی هەموو لیستەکان لە هەموو پارێزگاکان بۆ نەوەی نوێ بوایە، بەڵام ئامادەین بەمشێوەیە دابەشی بکەین: ناوەوەی هەرێمی کوردستان نەوەی نوێ و دوو سەرۆک لیستی هەبێت، یەکگرتوو یەک سەرۆک لیست، دەرەوەی هەرێمی هەرێمی کوردستان کۆمەڵ یەک سەرۆک لیست و یەکگرتوو یەک سەرۆک لیست بەشدار بێت.

لەبارەی پۆستی وتەبێژی ئەو هاوپەیمانێتییەی کە پێشبینی دەکرێت لەنێوان ئەو لایەنانە ڕابگەیێنرێت، نەوەی نوێ دەڵێت، پێمان باشە وتەبێژی هاوپەیمانێتییەکە لە کۆمەڵی دادگەری و مخەولی هاوپەیمانێتییەکە لە یەکگرتووی ئیسلامی بێت.