حکومەتی عێراق: گۆڕانکاری لە خشتەی کۆتاییهاتنی ئەرکی هاوپەیماناندا نەکراوە

ئاڤا نیوز

وتەبێژی حکومەتی عێراق دەڵێت، خشتەی کۆتاییهاتنی ئەرکی هاوپەیمانی نێودەوڵەتیی دژی داعش گۆڕانکاری تێدا نەکراوە و عێراق و هاوپەیمانان پابەندن بە ڕێککەوتنەکان.

وێنە گەورەکە: بەگوێرەی ڕێککەوتنی نێوان حکومەتی عێراق و ئەمریکا کە سەرۆکایەتی هاوپەیمانی نێودەوڵەتیی دژی داعش دەکات، لە ئەیلولی ساڵی داهاتوودا ئەرکی هاوپەیمانێتییەکە لە عێراق کۆتایی دێت.

لێدوانی فەرمی: باسم عەوادی، وتەبێژی حکومەتی عێراق ڕایگەیاند، ئەو خشتەیەی لە نێوان عێراق و هێزەکانی هاوپەیمانی نێودەوڵەتی بۆ کۆتاییهێنان بە ئەرکی هاوپەیمانی نێودەوڵەتیی لەسەری ڕێککەوتوون وەک خۆی ماوەتەوە و هیچ گۆڕانکاری یان  هەموارکردنەوەیەکی تێدا نەکراوە.

زانیاریی زیاتر: وتەبێژی حکومەتی عێراق لەبارەی هەڵبژاردنەکانی پەرلەمانی عێراق کە بریارە لە 2025-11-11 بکرێت وتی، بۆ سەرکەوتنی هەڵبژاردن هەموو پشتیوانییەکی کۆمسیۆنی هەڵبژاردنەکان دەکەین.هەڵبژاردنەکە پشتی بە ئامێر و ڕێکاری بەهێز بەستووەو هیچ لایەنێکی دەرەکی یان ناوخۆ ناتوانێت دەستوەردانی تێدا بکات، حکومەت پابەندە بە کارکردن بۆ بەڕێوەبردنی هەڵبژاردنێکی پاک و بێگەرد. پێشبینی دەکەین ئاستی بەشداریی خەڵک لە هەڵبژاردنەکە بەرزبێت، چونکە حکومەتەکەمان متمانەی هاووڵاتیانی بە پرۆسەی سیاسی و ئابووری گەڕاندووەتەوە.