پەکەکە بەفەرمی چەکدانان و هەڵوەشاندنەوەی خۆی ڕاگەیاند

ئاڤا نیوز

پارتی کرێکارانی کوردستان 'پەکەکە' ئەنجامی کۆنگرەی 12ی خۆی ئاشکرا کرد و چەکدانان و هەڵوەشاندنەوەی خۆی ڕاگەیاند.

چیرۆکی سەرەکی: ڕۆژانی 5 تا 7ـی ئایاری ئەمساڵ کۆنگرەی 12ـی پەکەکە لە یەک کاتدا لە دوو ناوچەی جیاواز بە هۆکاری ئەمنی بەسترا، بە کۆی گشتی 232 نوێنەر بەشداربوون، ئەمڕۆش ئەنجامی کۆنگرەکەی ڕاگەیاند.

ڕاگەیێنراوی فەرمی: پارتی کرێکارانی کوردستان 'پەکەکە' لەبارەی کۆنگرەکە ڕایگەیاند:

٠ کۆنگرە هەیکەلی تەشکیلاتی پارتی هەڵوەشاندەوە، کۆتایی بە خەباتی چەکداری و هەموو ئەو چالاکییانەی بەناوی پەکەکەوە ئەنجام دەدرا هێنا، بڕیارماندا خۆمان هەڵبوەشێنینەوە و چەک دابنێن.

٠ بڕیاری کۆنگرەکەمان بۆ هەڵوەشاندنەوەی پارتی و کۆتاییهێنان بە شێوازی خەباتی چەکداری، بناغەیەکی تۆکمە بۆ ئاشتی بەردەوام و چارەسەری دیموکراسی دەڕەخسێنێت، جێبەجێکردنی ئەو بڕیارانەی کە قسەیان لەسەر دەکرێت، پێویستی بە بەڕێوەبردن و ئاراستەکردنی پرۆسەکە هەیە، هەروەها پێویستی بە داننان بە مافە سیاسییە دیموکراسیەکان و گەرەنتی یاسایی دروست هەیە.

٠ داوا لە حکومەت و لایەنی سەرەکی ئۆپۆزسیۆن و پارتە سیاسییەکانی نوێنەرایەتی لە پەرلەمان و ڕێکخراوەکانی کۆمەڵگەی مەدەنی و هەموو لایەک دەکەین کە بەرپرسیارێتی هەڵبگرن و بچنە ناو پڕۆسەی ئاشتی و کۆمەڵگەی دیموکراسی.

٠ داوا لە زلهێزە نێودەوڵەتییەکان دەکەین، کە بەرپرسیارێتی ئەو سیاسەتە جینۆسایدانەی کە لە سەد ساڵی ڕابردوودا دژی گەلەکەمان ئەنجام دراوە، لە ئەستۆ بگرن و ڕێگری لە چارەسەری دیموکراسی نەکەن و پاڵپشتی بوونیادنەر بۆ پڕۆسەکە بکەن.

زانیاریی زیاتر: پەکەک لە کۆنگرەی 12ـدا، کوژرانی دوو سەرکردە و دامەزرێنەری پارتەکەی بەناوەکانی عەلی حەیدەر قەیتان و رەزا ئاڵتون ڕاگەیاند.