بەرهەمهێنانی نەوت لە چەند بیرە نەوتێکی کەرکووک دەستپێدەکاتەوە

ئاڤا نیوز

دوای وەستانیان بۆ ماوەیەک لە کارکردن و بەرهەمهێنانی نەوت، کۆمپانیای نەوتی باکوور تەواوبوونی ڕێکارەکان بۆ دووبارە بەرهەمهێنان لە سێ بیرە نەوتی کێڵگەی بای حەسەن لە پارێزگای کەرکووک ڕادەگەیەنێت.

چیرۆکی سەرەکی: لە مانگی ئازاری ئەمساڵەوە حکومەتی عێراق و کۆمپانیای بریتیش پیترۆلیۆم (BP) بۆ پەرەپێدانی هەر چوار کێڵگە نەوتییەکەی کەرکووک، ڕێککەوتنێکیان بۆ ماوەی 25 ساڵ واژۆکرد، بەگوێرەی ڕێککەوتنەکەش بەرهەمهێنانی نەوت لە کێڵگەکانی کەرکووک لە 308 هەزار بەرمیلەوە بۆ 420 هەزار بەرمیل زیاد دەکرێت.

لێدوانی فەرمی: یاسین جومعە، بەڕێوەبەری ڕاگەیاندنی کۆمپانیای نەوتی باکوور ڕایگەیاند، تیمی ئەندازیاریی کۆمپانیاکەیان هەموو ئاستەنگییەکانی تایبەت بە دەستپێکردنەوەی بەرهەمهێنانی ڕاستەقینەی نەوتییان لە سێ بیرە نەوتی کێڵگەی بای حەسەن تەواوکردووە، ئەوەش هۆکار دەبێت بۆ دووبارە دەستکردنەوە بە بەرهەمهێنانی نەوت و زیادکردنی بەرهەمهێنان.

زانیاریی زیاتر: ئەم هەنگاوانە هاوکاتن لەگەڵ سیاسەتی حکومەت بۆ بەرزکردنەوەی ئاستی بەرهەمهێنانی نەوت و پشتبەستن بە توانای ناوخۆیی بۆ چارەسەری ئاستەنگییەکان کە بۆ بیرە نەوتییەکان دێنە پێش، هاوکات چاکسازیی و پاکسازیی کێڵگە نەوتییەکانیش کە ماوەیەکە دەستیانپێکردووە، مەترسی ڕووداوی نەخوازراو کەمدەکاتەوە.