سەرۆك بارزانی: لەیلا قاسم سیمبوولی ئازادیخوازیی مرۆڤی كوردە

ئاڤا نیوز

سەرۆك بارزانی لە یادی 51ـەمین ساڵیادی لەسێدارەدانی شەهید لەیلا قاسم و هاوڕێكانی دەڵێت، لەیلا قاسم نموونەی قارەمانییەتی كچی كورد و سیمبوڵی ئازادیخوازی مرۆڤی كوردە.

چی ڕوویدا: لە ڕۆژێكی وەك ئەمڕۆ لە 12-5-1974، لەیلا قاسم بووە یەكەم كچە شەهیدی ڕێگەی بزووتنەوەی ڕزگاریخوازیی كوردستان و لەو ڕۆژەدا لەگەڵ چوار لە هاوڕێی لەسێدارەدران.

پەیامی فەرمی: سەرۆک بارزانی لە هەژماری فەرمیی خۆی لە تۆڕی کۆمەڵایەتی 'ئێکس' لە 51ـەمین ساڵیادی لەسێدارەدانی شەهید لەیلا قاسم و هاوڕێکانی پەیامێکی بڵاوکردەوە و ڕایگەیاند، "لەیلا قاسم نموونەی قارەمانێتیی کچی کورد و سیمبوڵی ئازادیخوازیی مرۆڤی کوردە. ئەو بە ڕووی ستەمکاراندا هاتەوە و پشتی کردە ژیان و شەهید بوو، بەڵام بندەستی قبووڵ نەکرد. لە پەنجا و یەکەمین ساڵیادی لەسێدارەدان و شەهیدکردنی لەیلا قاسم و هاوڕێکانی هەزاران سڵاو بۆ ڕۆحی پاکیان و بۆ ڕۆحی هەموو شەهیدانی ڕێگەی ئازادی دەنێرین."

باكگراوند: شەهید لەیلا قاسم لە ساڵی 1971 لە بەشیی كۆمەڵناسیی كۆلێژی ئاداب لە زانكۆی بەغدا وەردەگیرێت، ئەو خانمە لەنێو زانكۆش لە هەڵوێستە نەتەوەیی و نیشتمانپەروەرییەكانی، سڵی نەدەكردەوە، هەر بۆیە ڕژێمی بەعس، لەگەڵ چوار لە هاوڕێكانی بە ناوەكانی؛ جەواد هەمەوەندی، نەریمان فوئاد مەستی، حەسەن حەمەڕەشید و ئازاد سلێمان، دەستگیریان دەكات و بە دڕندانەترین شێوە ئەشكەنجە دەدرێن، ڕاستەوخۆ لە دادگاییكردنێكی نادادوەرانەدا، بڕیاری لەسێدارەدانی بۆ دەركردن، لە كاتێكدا دوو هەفتە بەسەر گرتنیان تێنەپەڕیبوو، لە سەعات حەوتی بەیانی ڕۆژی 12ـی ئایاری 1974 لەیلا قاسم و هەر چوار هاوڕێكەی لەسێدارەدران، كە بە وتنەوەی سروودی نیشتمانی ئەی ڕەقیب، چووە بەر پەتی سێدارە.