ئۆجەلان کەی ئازاد دەکرێت؟

ئاڤا نیوز

پەرلەمانتارێکی دەمپارتی لەبارەی خۆ هەڵوەشاندنەوەی پەکەکە بە ئاڤا میدیای ڕاگەیاند، پەکەکە باشترین کاری کرد و پەیامێکیشی بە هەموو جیهان دا و وتی، شتێک نەماوە بەناوی خەباتی چەکداری. هاوکات وتیشی، بەم نزیکانە عەبدوڵڵا ئۆجەلان ئازاد دەکرێت.

چیرۆکی سەرەکی: دوای دەیان ساڵ لە شەڕ، دواجار پەکەکە خۆی هەڵوەشاندەوە و ئەنجامی کۆنگرەی 12ـی خۆی ڕایگەیاند و دەڵێت، بە هۆکاری ئەمنی لە یەک کاتدا لە دوو ناوچەی جیاواز بە ئامادەبوونی 232 نوێنەر کۆنگرەیان بەستووە، پەیکەری ڕێکخستن پەکەکەیان هەڵوەشاندەوە، کۆتایی بە خەباتی چەکداری و هەموو ئەو چالاکییانەی بەناوی پەکەکەوە ئەنجام دەدرا، هێنا و چەک دادەنێن.

ڕاگەیێنراوی فەرمی: لەمبارەیەوە میدیاکانی تورکیا دەڵێن: ئۆجەلان داوای ئازادکردنی نەکردووە و لە ئیمرالی دەمێنێتەوە،  ژینگەیەکی کارکردنی گونجاوی بۆ دەرەخسێت، ئاڤا زانیویەتی ئێستا ئۆجەلان چرکە بە چرکە ئاگاداری بەرەوپێشچوونەکانە، بۆ لەمەودوا سەردانیکردن بۆ لای ئۆجەلان ئاسانتر دەبێت و لە هەفتەیەکدا دوو سێ جار هاوڕێ و نزیکەکانی دەتوانن بچنە لای. ئەوەش زانراوە کە ئۆجەلان خۆی خواستی هاتنە دەرەوەی نییە و ئیمراڵی بە پارێزرزاوترین شوێن دەبینێت.

لێدوانی فەرمی: محەممەد کاماچ، پەرلەمانتاری دەمپارتی بە ئاڤای ڕایگەیاندووە، پەکەکە باشترین کاری کرد کە خۆی هەڵوەشاندەوە، چەکدانانی پەکەکە تەنیا لە سوودی تورکیا نییە، بەڵکو پەیامێکی بە هەموو جیهان دا و وتی شتێک نەماوە بەناوی خەباتی چەکداری، لەم نزیکانەیش عەبدوڵڵا ئۆجەلان ئازاد دەکرێت.