لە یەک هەفتەدا ڕەزامەندی چوار پڕۆژەی ڕێگاوبان و ئاوەڕۆ بۆ هەڵەبجە وەردەگیرێت

ئاڤا نیوز

 

لەماوەی یەک هەفتەدا شارەوانی هەڵەبجە ڕەزامەندی چوار پڕۆژەی گەورەی ڕێگاوبان و ئاوەڕۆ وەردەگرێت و قۆناغەکانی چاککردنی ئاوەڕۆی هەڵەبجە دەستیپێکرد.

 

وێنە گەورەکە: کابینەی نۆیەمی حکومەتی هەرێمی کوردستان لەماوەی چەند ساڵی ڕابردوودا چەندین پڕۆژەی ستراتیژی لە پارێزگای هەڵەبجە دەستپێکردووە و دووجار سەرۆکوەزیران مەسرور بارزانی سەردانی ئەو پارێزگایەی کردووە.

 

لێدوانی فەرمی: سەلام بیلال، سەرۆکی شارەوانی هەڵەبجە بە ئاڤا میدیای وت، لەماوەی یەک هەفتەدا چوار پڕۆژەی گرنگی ڕێگاوبان و ئاوەڕۆ لە وەزارەتی شارەوانییەوە بۆ هەڵەبجە بڕیاری لێدراوە و بەشێکیان دەستیان پێکردووە.

 

بەوتەی سەرۆکی شارەوانی هەڵەبجە پڕۆژەکان بەمجۆرەن:


- ڕەزامەندی وەرگیرا بە بەهای سێ ملیار دینار بۆ دروستکردنی زێرابی سندوقی و چاککردنی ئەو گرفتانەی دەبن بە هۆکاری دروستبوونی لافاو لە هەڵەبجە.

- لە ساڵی 2010ـەوە بودجەی چوار ملیار دینار تەرخانکرابوو بۆ دروستکردنی دوو زێرابی سندوقی، بەڵام وەستابوو، هەفتەی پێشوو ڕەزامەندی وەرگیرا و کۆمپانیا دەستی بە کارەکانی کردەوە.

- ڕەزامەندی وەرگیرا بۆ دروستکردنی ڕێگا لە گەڕەکی ئەندازیارانی هەڵەبجە بە بەهای ملیارێک و 650 ملیۆن دینار.

- چاککردنی ڕێگای ناوچەی پیشەسازی هەڵەبجە سپاردەی کۆمپانیا کراوە و کارکردن تیایدا دەستی پێکردووە.

باکگراوند: ڕۆژی 14-4ـی ئەمساڵ پەرلەمانی عێراق دەنگیدا لەسەر بە پارێزگابوونی هەڵەبجە وەک 19ـیەمین پارێزگای عێراق و ڕێکارە یاسایی و دەستوورییەکانی بڕی و ئێستا هەڵەبجە لە عێراق وەک پارێزگایەکی فەرمی مامەڵەی لەگەڵ دەکرێت.