ئیدارەی ڕۆژئاوای کوردستان: بانگەوازەکەی ئۆجەلان بۆ بەدیهێنانی ئاشتییە

ئاڤا نیوز

 

ئیدارەی ڕۆژئاوای کوردستان پێشوازی لە بانگەوازەکەی ئۆجەلان و بڕیاری پەکەکە بۆ خۆ هەڵوەشاندنەوەی دەکات و دەڵێت، بانگەوازەکەی ئۆجەلان ئاشتی بەدیدەهێنێت.

 

ئەوەی پێویستە بیزانیت: لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە، دوێنێ پەکەکە دەرئەنجامی کۆتا کۆنگرەی خۆی ئاشکراکرد و ڕایگەیاند، خۆیان هەڵدەوەشێننەوە و کۆتایی بە خەباتی چەکداریی دەهێنن.

 

ڕاگەیێنراوی فەرمی: ئیدارەی ڕۆژئاوای کوردستان لە ڕاگەیێنراوێکدا کە ئەمڕۆ سێشەممە بڵاویکردووەتەوە ئاماژەی بەوەشداوە، پڕۆژەی ئۆجەلان بۆ چارەسەری کێشەکانی ڕۆژهەڵاتی ناوەڕاست لەسەر بنەمای ئاشتی، دیموکراسی و دادپەروەریی کۆمەڵایەتییە و پڕۆژەیەکی مێژووییە، پڕۆژەکەش کاریگەری گرنگی لەسەر بەڕێوەبردن و دۆخی هەرێمی باکوور و ڕۆژهەڵاتی سووریا هەبووە. 

 

بەشێکی دیکە لە ڕاگەیێنراوەکەی ئیدارەی ڕۆژئاوای کوردستان:

- پرۆژەی ئۆجەلان بۆ چارەسەری کێشەکانی ڕۆژهەڵاتی ناوەڕاست لەسەر بنەمای ئاشتی، دیموکراسی و دادپەروەریی کۆمەڵایەتی، مێژووییە.

- پرۆژەکە جەخت لە کۆمەڵگەی دیموکراسی، برایەتی، ئازادی ژن و پاراستنی ژینگە دەکاتەوە و تەنیا بۆ چارەسەری کێشەی کورد نییە، بەڵکو بۆ ئازادبوونی گەلانە لە ستەم و توندڕەوی نەتەوەیی و ئاینیی.

- پرۆژەکە کاریگەری گرنگی لەسەر بەڕێوەبردنی هەرێمی باکوور و ڕۆژهەڵاتی سووریا هەبووە.

- جەخت لە گرنگی پشتیوانی گەلان و کۆبوونەوەیان لە دەوری ئەم هەنگاوە دەکەینەوە، بەهێزکردنی دیموکراسیی، بوونیادنانی کۆمەڵگەی فرەیی بۆ ڕووبەڕووبوونەوەی ستەمکاریی و خەباتی دیموکراسی گەلان بنەمای سەرەکییە بۆ گۆڕانکاری لەناوچەکەدا و بونیادنانی سیستەمێک لەسەر بنەمای ئازادی و ڕێزگرتن لە شکۆی مرۆڤ.