وەزارەتی ئاوەدانكردنەوەی عێراق تێچووی پرۆژەیەک لە پارێزگای هەڵەبجە لە ئەستۆ دەگرێت

ئاڤا نیوز

 

بەڕێوەبەرایەتیی گشتیی شارەوانییەکان لە وەزارەتی ئاوەدانکردنەوە و نیشتەجێکردن و شارەوانییەکان گرێبەست لەگەڵ کۆمپانیایەکی خۆماڵی دەکات بۆ جێبەجێکردنی پڕۆژەی ڕێگای ناوچەی پیشەسازی لە پارێزگای هەڵەبجە.

 

بەڵگەنامەی فەرمی: بەگوێرەی بەڵگەنامەیەکی فەرمی، کە وێنەیەکی دەست ئاڤا میدیا کەوتووە، ناوەرۆکی بەڵگەنامەکە گرێبەستی نێوان وەزیری ئاوەدانکردنەوە و نیشتەجێکردن و شارەوانییە گشتییەکان لەگەڵ کۆمپانیای سەلام تاڵیب-ـە بۆ بەڵێندەرایەتی ئاوەدانکردنەوە.

 

زانیاریی زیاتر: بەگوێرەی گرێبەستەکە، کۆمپانیای ناوبراو پابەند دەبێت بە جێبەجێکردنی پڕۆژەی ڕێگای ناوچەی پیشەسازی لە پارێزگای هەڵەبجە بەپێی نەخشە و تایبەتمەندی و جۆری کەرەستەکانی.

 

ئەوەی لەوبارەیەوە دەگوترێت: لاپەڕەی پارێزگای هەڵەبجە لە فەیسبووک لەوبارەیەوە نووسیویەتی: دوابەدوای هەوڵەكانی پارێزگای هەڵەبجە بە خۆشحاڵییەوە ئەمڕۆ گرێبەستی پڕۆژەی شەقامەكانی ناوچەی پیشەسازی هەڵەبجە لە نێوان وەزارەتی ئاوەدانكردنەوە و شارەوانییەكانی عێراق و كۆمپانیای سلام طالب واژۆ كرا.

 

ئەوەی پێویستە بیزانیت: پڕۆژەكە لەسەر  بودجەی وەزارەتی ئاوەدانكردنەوەی حكومەتی عێراق جێبەجێدەكرێت و كۆمپانیای ناوبراو لە ماوەیەكی دیاریكراودا دەست بەكارەكانی دەكات.