ئەو گەنجەی بەپێ چووە عومرە گۆچانەکەی بەخشییە ئارین مەسرور بارزانی

ئاڤا نیوز

 

گەنجێکی هەرێمی کوردستان دوای ئەوەی بۆ بەجێهێنانی سوننەتی عومرە بەپێ چووە سعودیە، دوای گەڕانەوەی، گۆچانەکەی وەک دیاریی بەخشییە ئارین مەسرور بارزانی. 

 

چیرۆکی سەرەکی: ئاوارە ئەسعەد، دانیشتووی هیران و نازەنینی سەر بە قەزای شەقڵاوە، ڕێککەوتی 11ـی ئازاری ئەمساڵ لە قەڵای هەولێرەوە  بەپێ بەرەو سعودییە بەڕێکەوت و دوای نزیکەی 44 ڕۆژ و بڕینی نزیکەی 2500 کیلۆمەتر گەیشتە مەککە و سوننەتی عومرەی بەجێهێنا.

 

لێدوانی فەرمی: ئاوارە ئەسعەد دوای گەڕانەوەی، باسی گەشتەکەی کرد و بە ئاڤای ڕاگەیاند، نزیکەی 44 ڕۆژی پێچوو تا لە هەولێرەوە گەیشتە مەککە، لەو ماوەیەشدا بە چەندین یادگاریی خۆش و ناخۆشدا تێپەڕیووە.

 

پەیامی ڤیدیۆیی: ئاوارە ئەسعەدی تەمەن 33 ساڵ پاش گەڕانەوەی لە سعودیە، لە پەیامێکی ڤیدیۆییدا داوای کرد ئارین مەسرور بارزانی لە نزیکەوە ببینێت.

 

چی ڕوویدا: پاش ئەو پەیامە ڤیدیۆییە، ئارین مەسرور بارزانی بەدەم داواکارییەکەی ئاوارە ئەسعەدەوە چوو و چاوی پێی کەوت. وەک خۆی دەڵێت، ئارین مەسرور بارزانی لەبارەی گەشتەکەیەوە دەسخۆشی لێکردووە. دواتریش ئاوارە ئەسعەد گۆچێکی کە لە گەشتەکەیدا لە سعودیە هێنابوویەوە بە دیاری بەخشییە ئارین مەسرور بارزانی.