گەنجێک برایەک و دوو براژنی دەکوژێت و کۆتایی بە ژیانی خۆشی دەهێنێت

ئاڤا نیوز

 

ئێوارەی ئەمڕۆ گەنجێک لە ناحیەی کەلەکچی دەسترێژی گوللە لە براکەی و دوو براژنی دەکات و دواتر لە شوێنی ڕووداوەکە هەڵدێت. پاشان لەسەر قەبرستانێک کۆتایی بە ژیانی خۆشی دەهێنێت.

 

وێنە گەورەکە: ماوەیەکە ڕووداوی (کوشتنی بەکۆمەڵ) بە دەستڕێژیی گوللە لە هەرێمی کوردستان ڕووی لە زیادبوون کردووە و لە ماوەی چەند مانگی ڕابردوودا ئەمە چەندین جارە دووبارە دەبێتەوە. دوایین ڕووداویش کوشتنی پێنج ئەندامی خێزانێک بوون لە سەید سادق کە لە لەلایەن ئەندامێکی خێزانەکەیان کوژران و دواتریش بکوژەکە خۆشی کوشت.

 

لێدوانی فەرمی: سەردار شێخ یەحیا، قایمقامی قەزای شێخان بە ئاڤای ڕایگەیاند: ئێوارەی ئەمڕۆ گەنجێک برایەک و دوو ژنبرای خۆی دەکوژێت و لە شوێنی ڕووداوەکە هەڵدێت.

 

هۆکارە زانراوەکان: ڕووداوەکە دەگەڕێتەوە بۆ کێشەیەکی کۆمەڵایەتی، کە تیایدا کەسێک بەناوی "ئیبراهیم ئیسماعیل ئیبراهیم"، برایەکی خۆی بەناوی لوقمان ئیسماعیل تەمەن 25 ساڵان، سیران عەبدولڕەحمان تەمەن 25 ساڵ و دەولە جەمیل تەمەن 32 ساڵان دەکوژێت، کە هەردووکیان ژنبرای بکوژەکەن.

 

ئەوەی پێویستە بیزانیت: بە گوێرەی زانیارییەکانی ئاڤا، کەمێک پێش ئێستا بکوژەکە لە نزیک قەبرستانی ناحیەی کەلەکچی کۆتایی بە ژیانی خۆی هێنا و خۆی کوشت.

 

باکگراوند: ئەمە یەکەم ڕووداوی لەمجۆرە نییە کە کەسێک ئەندامانی خێزانەکەی کۆمەڵکوژ بکات؛ لە ماوەی ڕابردوودا و تەنیا لەمساڵدا لە دوو ڕووداوی هاوشێوەیەدا، یەکەمیان لە هەولێر، دکتۆرێک ڕێککەوتی 13ـی 3ـی 2025 هەڵیکوتایە سەر ماڵی خەزووری و بە چەکی تاپڕ پێنج کەسی کوشت. دواتریش لە گرێزەی سەر بە قەزای سەید سادق گەنجێک بەهۆی کێشەیەکی کۆمەڵایەتییەوە پێنج کەسی لە ئەندامانی خێزانەکەی کوشت و دواتریش خۆی کوشت.