تیمەکانی بەرگریی شارستانیی هەولێر ژیانی بەچکە پشیلەیەک ڕزگار دەکەن

ئاڤا نیوز

لە قوتابخانەیەکی ئامادەیی شاری هەولێر، بەچکە پشیلەیەک لەلایەن تیمەکانی بەرگریی شارستانیی هەولێرەوە دوای 45 خولەک لە هەوڵدان توانییان پشیلەکە لە قووڵایی 2 مەتر دەربهێنن.

وێنە گەورەکە: لەنێو قوتابخانەی ئامادەیی ڕزگاریی کوڕان لەسەر شەقامی 30 مەتریی هەولێر، چەند قوتابییەک لە حەوشەی قوتابخانەکەیان پیاسە دەکەن، کاتێک دەگەنە لای مەنهۆڵێکی قوتابخانە گوێیان لە دەنگی پشیلەیەک دەبێت، بەڵام بەهۆی قووڵیی بیرەکەوە ناتوانن ڕزگاری بکەن و دواتر مامۆستاکانیان ئاگادار دەکەنەوە و ئەوانیش پەیوەندیی بە تیمەکانی بەرگریی شارستانییەوە دەکەن.

لێدوانی فەرمی: مقەدەم شاخەوان، گوتەبێژی بەرگریی شارستانیی هەولێر دەڵێت: 45 خولەکمان پێچوو تاوەکو توانیمان پشیلەکە ڕزگار بکەین.

ئەوەی پێویستە بیزانیت: قووڵایی بیرەکە دوو مەترە و کارمەندێکی بەرگریی شارستانیی دوای شکاندنی سەری مەنهۆڵەکە دەچێتە ناوی و پشیلەکە ڕزگار دەکات و دەیبەنە لای پزیشکی ڤێتەرنەری.