وتەبێژی یەپەگە: ستراتیژی دیمەشق دابڕینی شارەکانی ڕۆژئاوایە لە یەکتری

ئاڤا نیوز

 

وتەبێژی یەپەگە دەڵێت: هێزەکانی سوپای سووریا و میلیشیاکانی نزیک لە تورکیا دەیانەوێت شار و شارۆچکەکانی ڕۆژئاوا لە یەکتری داببڕن بۆ ئەوەی بە ئاسانی کۆنتڕۆڵیان بکەن. هاوکات ستایشی پشتیوانییەکانی سەرۆک بارزانی کرد بۆ ڕۆژئاوای کوردستان.

 

لێدوانی فەرمی: سیامەند عەلی، وتەبێژی یەپەگە لە چاوپێکەوتنێکی تایبەتدا لەگەڵ ئەلمۆنیتەر ڕایگەیاند: شەڕی تووند لە دەوروبەری کۆبانێ و کارگەی چیمەنتۆی لافارژ بەردەوامە. سوپای سووریا چەکی قورس و درۆنی تورکی جۆری "بایرەکتار" و "ئاکینجی" دژی کورد بەکاردەهێنێت.

 

- ژمارەی هێزەکانی هەسەدە نزیکەی 100 هەزار شەڕکەر بوون، بەڵام نیوەیان (50,000 کەس) کە چەکداری عەرەب بوون، چوونەتە پاڵ حکوومەتەکەی ئەحمەد شەرع.

 

- سوپای سووریا هەوڵ دەدات ڕێگەی سەرەکی M5 ( شاڕێگەی M5 بە گرینگترین و ستراتیژیترین ڕێگای وشکانی لە سووریا دادەنرێت.) بگرێت بۆئەوەی قامیشلۆ لە سنووری عێراق داببڕێت.

 

ئەوەی پێویستە بیزانیت: وتەبێژەکەی یەپەگە ڕەخنە لە بێدەنگی ئەمریکا دەگرێت و دەڵێت: بێدەنگیی ئەمریکا جێگەی شۆکە و زیندانیانی داعش بەبەرچاوی هێزەکانی هاوپەیمانان ڕادەکەن.