ئاڤا لەزاری هاونیشتمانییەک دۆخی سەختی شاری کۆبانێ دەگێڕێتەوە

ئاڤا نیوز

 
نزیکەی 10 ڕۆژە شاری کۆبانێ لە ڕۆژئاوای کوردستان لەژێر گەمارۆیەکی چڕدایە و ڕێگە نادرێت هاوکارییە مرۆییەکان بگەیێنرێن، بارودۆخی مرۆیی لە شاری کۆبانێ و دەوروبەری گەیشتووەتە ئاستێکی نالەبار و هۆشداریی لە کارەساتی مرۆیی دەدرێت، بەهۆی تێکچوونی دۆخی ئەمنی و نەبوونی خزمەتگوزارییە سەرەتاییەکان، هەزاران خێزانی ئاوارە لە بارودۆخێکی سەختدا ژیان بەسەر دەبەن.

 

چیرۆکی سەرەکی: غاندی داود هاونیشتمانییەکی کۆبانێیە بە ئاڤا میدیای گووت: خواردن، شیری منداڵان، دەرمان، ئاو، کارەبا و سووتەمەنی بە ئەستەم دەست دەکەوێت، لەگەڵ ئەمەشدا هاونیشتمانیان بە پیر و گەنجەوە هەستی نەتەوایەتیان زۆر بەرزە و ئامادەی هەموو بەرگریکردنێکن، بەڵێنیان داوە یان مردن یان مانەوە و دەست بەرنەدان لە خاکی کۆبانێ.

 

- ئەو هاونیشتمانییە گووتیشی: یەک هەڵوێستی و پشتیوانیی کوردان لە ئەوروپا و پارچەکانی کوردستان، هێندەی دیکە گڕوتین و ئیرادە و وزە و هێزی بەرگریکردنمان پێدەبەخشن.

لەلایەکی دیکە: ئەنجوومەنی کۆبانێ بانگەوازێکی بەپەلەی گەیاندنی کۆمەک و هاوکاری ئاراستەی هەر چوارپارچەی کوردستان و خێرخوازان و ڕێکخراوە نێودەوڵەتییەکان دەکات، کە ئاوارەیەکی زۆر ڕووی تێکردوون و خەڵکی کۆبانێ و ئاوارەکان لە بارودۆخێکی زۆر خراپ و لەبەردەم هەڕەشە و مەترسی کارەساتی مرۆییدان، داواش دەکەن ڕێڕەوێک بۆ گەیاندنی کۆمەک و هاوکاریی مرۆیی بە ڕووی خەڵکەکە بکرێتەوە.

 

زانیاریی زیاتر: مانگی سووری کوردیش لە کۆبانێ دەڵێت، تا ئێستا ژمارەیەک منداڵ بەهۆی سەرما گیانیان لەدەست داوە، هاوکات بەهۆی نەمانی ئۆکسجینەوە، سێ شەممە 27-1-2026 منداڵێک گیانی لەدەست دا. 

 

زانیاریی پەیامنێر: لەبارەی دۆخی کۆبانێ ڕەزوان بێزار، پەیامنێری ئاڤا دەڵێت: بەشێوەیەکی بەردەوام شەڕ لە ناوچە جیاجیاکانی کۆبانێ هەیە و چەکی قورس و تانک و زریپۆشی تێدا بەکاردەهێنرێت، هێزەکانی سووریای عەرەبی هەوڵی ئەوە دەدەن گوند و ناوچەکان بخەنە ژێردەستی خۆیان، لەبەرامبەردا هەموو هێزەکان لە کۆبانێ، ئامادەیی تەواوی خۆیان کردووە بۆ بەرگریکردن و ڕووبەڕووبوونەوەی هەر هێرشێک، لەبەر یەکگرتوویی هەڵوێستی هەموو هێزە کوردییەکان لە کۆبانێ و دەڵێن: شەڕ شەڕی دژی کوردە، بۆیە ئێستا بە جیا جیا ناوی هیچ هێزێکی دیاریکراوی کورد ناهێنرێت، بەڵکو کوردەکان و هێزەکان، هەمووان وەکو هێزێکی پارێزگاریکردن لە کۆبانێ ناویان دەهێنرێت.