عێراق پێشوازی لە هەڵگرتنی سزاکانی سەر سووریا دەکات

ئاڤا نیوز

وەزارەتی دەرەوەی عێراق ڕایگەیاند، بەغدا پێشوازی لە بڕیارەکەی سەرۆکی ئەمریکا دەکات بۆ هەڵگرتنی سزاکانی سەر سووریا و ئومێدی وایە ئەم بڕیارە سەرەتای کۆتاییهاتنی قەیرانە مرۆیی و ئابوورییەکانی ئەو وڵاتە بێت.

ئەوەی پێویستە بیزانیت: دوێنێ سەرۆکی ئەمریکا لە سعوودیەوە ئاشکرایکرد کە سزاکانی سەر سووریا هەڵدەگرێت و دەرفەتێک بۆ ئاوەدانکردنەوەی وڵاتەکە بە سەرکردایەتی نوێ دیمەشق دەدات.

ڕاگەیێنراوی فەرمی: وەزارەتی دەرەوەی عێراق لە ڕاگەیێنراوەکەیدا ئاماژەی بەوەکردووە، عێراق پێشوازیی لە بڕیارەکانی دۆناڵد ترەمپ، سەرۆکی ئەمریکا دەکات بۆ هەڵگرتنی سزاکانی سەر سووریا و لەم بارەیەشەوە ستایشی هەوڵەکانی سعوودیە دەکات.

- عێراق ئومێدەوارە ئەم هەنگاوە سەرەتای قۆناغێکی نوێی هەماهەنگی نێودەوڵەتی بێت بۆ کۆتاییهێنان بە قەیرانی سووریا لەڕێگەی چارەسەری گشتگیر و ئاشتییانە، بەجۆرێک یەکێتی و سەروەری وڵاتەکە و مافی هەموو پێکهاتەکانی ناوی بپارێزێت.

- عێراق داوا دەکات بە هەموو شێوەیەک ڕووبەڕووبوونەوەی تیرۆر بەردەوامیی پێبدرێت و ڕێگە نەدرێت تەشەنە بکات.