ئاڤا زانیاریی نوێ لەبارەی تەقەکردن لە تەکیەی کەسنەزانی ئاشکرا دەکات

ئاڤا نیوز

 

دوای ئەوەی ئاڤا بڵاوی کردەوە بەرەبەیانیی ئەمڕۆ چوارشەممە دەستدرێژی گوللە لە تەکیەی شێخ نەهرۆ کەسنەزانی کرا، بەرپرسی پاسەوانەکانی تەکیەی کەسنەزانی هەواڵەکەی پشتڕاست کردەوە و گوتی، "دەستڕێژی گوللەمان لێ کرا و ئێمەش وەڵامماندانەوە".

 

چیرۆکی سەرەکی: بەرەبەیانیی ئەمرۆ چوارشەممە، ڕێککەوتی 2025/5/14، لە شاری سلێمانی، کاتژمێر 2:00ـی بەرەبەیان دوو سەیارەی جۆری لانکرۆزەری سپی تەقە لە تەکییەی کەسنەزانی دەکەن لە باخی بەختیاری لە سلێمانی.

 

لێدوانی فەرمی: وریا بەرزنجی، بەرپرسی پاسەوانەکانی تەکییەی شێخ نەهرۆ کەسنەزانی لە سلێمانی بە ئاڤا میدیای ڕاگەیاند: کاتژمێر 02:00ی شەو لەلایەن دوو ئۆتۆمبێل تەقە لە تەکییەی کەسنەزانی کرا و ئێمەش وەڵامماندانەوە.

 

لەبارەی زیانەکان، بەرپرسی پاسەوانەکانی تەکیەی کەسنەزانی دەڵێت: کەس بەهۆی ڕووداوەکەوە بریندار نەبووە، بەڵام ئێمە چاوەڕوانی ئەنجامی لێکۆڵینەوەی لایەنی پەیوەندیدارین.

 

بە گوتەی وریا بەرزنجی، "چەندین خێزانی لێقەوماو و هەژار لە تەکییەی کەسنەزانین، بەهۆی ڕووداوەکەی شەوی ڕابردووەوە توشی دڵەڕاوکێ بوون.

لەلایەکی دیکەوە: دەزگای ئاسایشی هەرێم بە ئاڤا میدیای ڕاگەیاند: ئەو دەنگە، دەنگی ئەگزۆزی ئۆتۆمبێل بووە، لە کامێراکانی چاودێریدا دیارە، ئەو کەسەش دەستگیرکراوە و رووبەرووی یاسا کراوەتەوە.

ئاسایشی سلێمانی وتیشی: بەهیچ شێوەیەک تەقە نەکراوە و بەڵگەی ڤیدیۆیشمان لەبەردەستە، شتەکەش ئەوەندە گەورە نیە تاوەکو گەورە بکرێت. لەیەکتێنەگەیشتنی خێرا لەنێوان پاسەوانەکانی تەکیەکە ڕوویداوە و تێنەگەیشتوون بابەت چیە، دەستبەجێ تەقەیان کردووە بە ئاسماندا.

باکگراوند: تەکیەی قادری کەسنەزانی دەکەوێتە گەڕەکی بەکرەجۆ، بە مەڵبەندی تەریقەتی قادری کەسنەزانی دادەنرێت، کۆڕی زیکر و فیکری تێدا دەگێڕدرێت و لە بۆنەکاندا لە هەموو جیهانەوە ڕووی تێدەکرێت، یەکێکە لە گەورەترین تەکیەکانی قادری لە کوردستان و جیهاندا.

 

زانیاریی زیاتر: تەکیەکە مێژوویەکی دێرین و پڕ لە خزمەتی بە شاری سلێمانی هەیە، خەڵکێکی زۆر ڕۆژانە سەردانی دەکەن، لەڕووی گەشتیاری و مێژوویی بە شوێنێکی گرنگ دادەنرێت.