ئەنجوومەنی وەزیران: دەبێت بەغدا بودجە و مووچە و شایستە داراییەکان بێ كێشە دابین بكات

ئاڤا نیوز

ئەنجوومەنی وەزیرانی هەرێمی كوردستان لە چوارچێوەی كۆبوونەوەی ئەمڕۆیدا پرسی مووچەی فەرمانبەرانی هەرێمی كوردستان و دابینكردنی بەشە بودجەی هەرێمی كوردستانی لەلایەن حكومەتی عێراقەوە تاوتوێ كرد.
 
چیرۆکی سەرەکی: ئەمڕۆ چوارشەممە 14ـی ئایاری 2025، بە سەرپەرشتيی سەرۆکوەزیران مەسرور بارزانی، ئەنجومەنی وەزیرانی هەرێمی کوردستان کۆبووەوە.

ڕاگەیێنراوی فەرمی: بەپێی ڕاگەیێنراوی كۆبوونەوەكەی ئەنجوومەنی وەزیران، لە كۆبوونەوەكەدا جەخت لەوە كراوەتەوە كە دەبێت حكومەتی عێراق ڕێز لە مافە یاسایی و دەستوورییەكانی هەرێمی كوردستان بگرێت.

قووڵتر: لە یەكێك لە بڕگەكانی كۆبوونەوكەدا، گفتوگۆ لەبارەی ڕاسپاردنی وەزارەتەکان و لایەنەکانی نەبەستراو بە وەزارەت لەلایەن ئەنجومەنی وەزیرانەوە کرا بۆ هاوئاهەنگی و هاریکاری دەستەی هاوبەشی وردبینی هەردوو دیوانی چاودێری دارایی فیدراڵ و هەرێمی کوردستان کە ئێستا سەرقاڵی ئامادەکردنی ڕەشنووسی ڕاپۆرتی هاوبەشن لە سەر وردبینی دارایی هەرێمی کوردستان لەبەر ڕۆشنایی یاسای بودجەی گشتی فیدراڵ بۆ ساڵەکانی 2023 ، 2024 ، 2025.

لەلایەكی دیكەوە: ئەنجوومەنی وەزیران وێڕای جەختکردنەوە لە بەردەوامبوونی هاریکاری و هاوئاهەنگی لایەنە پەیوەندیدارەکانی حکومەتی هەرێمی کوردستان لەگەڵ حکومەتی فیدڕاڵ، لە هەمانکاتدا دووپاتی کردەوە کە دەبێت حکومەتی فیدراڵ وەکو هەرێمێکی فیدڕاڵ و قەوارەیەکی دەستووری ڕەفتار لەگەڵ هەرێمی کوردستان بکات و ڕێز لە مافە یاسایی و دەستوورییەکانی هەرێمی کوردستان بگرێت و بەشە بودجەی هەرێم و شایستە داراییەکانی لە بودجەی گشتی فیدڕاڵ بێ کێشە دابین بکات، بە تایبەتیش کە هەرێمی کوردستان سەرجەم داواکارییە تەکنیکی و ژمێریاریی و یاساییەکانی حکومەتی فیدڕاڵیی سەبارەت بە لیستی مووچە و خانەنشینیی و تەرازووی پێداچوونەوە و دابینکردنی ژمارەی کەسی بێهاوتا بۆ سەرجەم مووچەخۆرانی هەرێم لە سەرجەم کەرتە جیاوازەکانی خزمەتی وەزیفیی جێبەجێکردووە.