لە سلێمانی دوو پڕۆژەی گەورەی كارەبا بە 13 ملیار دینار جێبەجێدەكرێن

ئاڤا نیوز

لە سنووری پارێزگای سلێمانی، دوو پرۆژەی گرنگی گواستنەوە و بەیەكبەستنەوەی كارەبا بە گوژمەی زیاتر لە 13 ملیار دینار جێبەجێ دەكرێن، كە بە تەواوبوونی، تۆڕی كارەبای هەرێمی كوردستان بەگشتی و ڕۆژهەڵاتی پارێزگای سلێمانی بەتایبەت بەهێزتر دەبێت.

وێنە گەورەكە: تۆڕی كارەبای وێستگەكانی تانجەرۆ، پێنجوێن، ئەزمه‌ڕ و دەربەندیخان لەڕێگەی جێبەجێكردنی دوو پرۆژەی گرنگەوە، بەیەكترەوە دەبەسترێنەوە، كە بەسەرپەرشتیی ڕاستەوخۆی بەڕێوەبەرایەتیی گشتیی كارەبای سلێمانی، لە سنووری ناوچەی پیشەسازیی عەربەت جێبەجێ دەكرێن، ئەوەش لەچوارچێوەی پاڵپشتی و هاندانی كەرتی پیشەسازی لە سنووری پارێزگای سلێمانی و بەهێزكردنی ژێرخانی سێكتەری كارەبا.

وردەكاری پرۆژەكان چین: پرۆژەكان بریتین لە ڕاكێشانی هێڵی 132 كەی ڤی، بۆ بەستنەوەی وێستگەی كارگەی ئاسنی 'سبائك' بە تۆڕی كارەبای نیشتمانی و وێستگەی كارەبای '132 كەی ڤی سبائك ئەلحەدید' و دانانی بگۆڕ (محاویلە)ـی 33 كەی ڤی، گوژمەی هەردوو پرۆژەكەش زیاتر لە 13 ملیار دینارە.

لێدوانی فەرمی: ئەنوەر حەمەسەعید، بەڕێوەبەری گشتیی كارەبای سلێمانی سەبارەت بە گرنگیی پرۆژەكان ڕایگەیاند، جێبەجێکردنی ئەم دوو پرۆژەیە لە سنووری پارێزگای سلێمانی، دەبێتە هۆی بەهێزكردنی تۆڕی كارەبای هەرێمی كوردستان بەگشتی و ڕۆژهەڵاتی پارێزگاى سلێمانی بە تایبەتی، ئەوەش بە بەستنەوەی وێستگەكانی تانجەرۆ، پێنجوێن، ئەزمه‌ڕ و دەربەندیخان بەیەکترەوە.