نانێکی تاڵ و گیرفانی بەتاڵ... پووچەڵکردنەوەی سیستمی فیدڕاڵ

شیکارییەک بۆ گوتارەکەی سەرۆک بارزانی لە کۆنگرەی یەکگرتنی هەردوو ڕێکخراوی قوتابیان و لاوانی پارتیدا.

بەشی یەکەم

1. بۆ پرسی مووچە و مامەڵەی بەغدا لەگەڵ مووچەخۆرانی هەرێمی کوردستان سەرۆک بارزانی وتی : " وایان لێکردووە کە خەبات و تێکۆشانی ئەم میللەتە، ئەو ھەموو ساڵانە، ئەو ھەموو سەرکردە قارەمانانە، ئەو ھەموو گەورانە، ئەو ھەموو شەھیدە، ئەو ھەموو ئەنفال و کیمیابارانە، ھەمووی لەبەر ئەوە بووە داوای مووچەیان کردووە، ئەگەر مەبەست مووچە بووایە، ئەو دەوڵەتانەی پێشتر دەستی کوردیشیان ماچ دەکرد و مەمنوونیش بوون." 

- سەرۆک بارزانی بەم دەربڕینە سەرلەنوێ جەوهەری پرسی کوردی بۆ یار و نەیار پێناسە کردەوە و بە ڕاشکاوی ڕەتیکردەوە کە خەباتێکی درێژخایەنی سەدساڵەی میللەتێک کورت بکرێتەوە بۆ پرسی مووچە و بوودجە.  

- گوتارەکەی سەرۆک بارزانی ڕەنگدانەوەی هەوڵێکی جدی بوو بۆ بووژاندنەوەی ویژدانی مردووی هەندێک بەناو سیاسەتمەداری کوردی 'پشت مۆبایل و لاپتۆپ و فەیسبووکچی' کە پێیان وایە بەدەستهێنانی مووچە دوا ئامانجی باڵای سیاسەت و کوردایەتییە!. گوتاری سەرۆک هەوڵێکە بۆ ڕووح بەبەراکردنەوەی نەگۆڕە نەتەوەییەکانی کوردایەتی: (کەرامەت، شوناس، شەهیدان).


2. "بە ڕێنمایی لایەنی نێوخۆیی بووە، ئەو مامەڵەی لە مانگەکانی پێشوو لەگەڵ مووچەخۆران کردوویانە، بەهیچ شێوەیەک جێگەی قبووڵ نییە."


- لەم بڕگەیەی گوتارەکەی سەرۆکدا، ئاماژەیەکی ڕوون و دیارە کە ئەو جۆرە مامەڵەیەی بەرپرسانی بەغدا لەگەڵ مووچەخۆرانی کوردستاندا کێشە و پرسێکی تەکنیکی نییە بەڵکو بە ئیمتیازی سیاسییە. 

 

- ئاماژەیەکی ڕوونە کە لە ناو سیستمی حوکمڕانیی عێراقدا باندێک هەیە کەهەمیشە لەبۆسەدایە و بە هاوکاری و ڕێنمای هەندێک بەناو کورد پلانێکی ئامادەی هەیە بۆ سزادانی خەڵک و حکومەتی هەرێم، چونکە لە بنەڕەتەوە بڕوایان بە فیدڕاڵیزم و دەستوور و برایەتی نێوان گەلانی عێراق نەبووە و نییە!، هەموو ئەوانەش بەلای هەر کوردێکی خاوەن کەرامەتەوە شیاوی قەبووڵکردن نییە. 


3. " ئەگەر فیدراڵی نەماوە، باپێمان بڵێن، چونکە ئەو مامەڵەی ئێستا لەگەڵ هەرێمی کوردستان دەکرێت، مامەڵەکردنی فیدڕاڵییەت نییە." 

- تۆن و سەنگی ئەم ڕستەیە تەواوی سیاسەتمەدار و حوکمڕانەکانی بەغدا دەخاتە بەردەم ئاڵانگارییەکی ڕاشکاوی بێ پێچ و پەناوە. سەرۆک بارزانی پرسیارێکی جەوهەری و وجودیی سەبارەت بە سرووشتی دەوڵەتی نوێی عێراق وروژاند و  پەیامێکی ڕوونیدا بە گوێیاندا: ئەگەر بەلای ئێوەوە فیدڕاڵیزم وەهم و خەونێکی ناخۆشە، فەرموون بێ پێچ و پەنا، بە ڕاشکاوی ڕایبگەیەنن، خۆ ئەگەر واشنیە کەواتە فەرموون دڵسۆزانە پێوەی پابەندبن!.


4. "نابێت دەستوەردان لە دەستووردا بکرێت، ئەگەر هەرێمی کوردستان کێشەیەکی هەیە، پەرلەمانی کوردستان هەیە، با ئەوان لێپێچینەوە لە حکومەت بکەن."


- سەرۆک بارزانی بەم دەربڕینەی هەر جۆرە دەستتێوەردان و زیادەڕۆییەکی بەغدای بۆ سەر دەزگا یاساییەکانی هەرێم ڕەتکردەوە و پابەندبوونی خۆی و حیزبەکەی بە پرەنسیپی خۆ بەڕێوەبەری و فیدڕاڵیزم دووپاتکردەوە.

- زۆر بەڕوونی هەرێمی کوردستانی وەک قەوارەیەکی سیاسیی خاوەن دەسەڵات وێناکردەوە و ڕەتیکردووەتەوە کە تەنها وەک یەکەیەکی ئیداریی ژێردەستە، مامەڵەی لەگەڵدا بکرێت.


5. ئەم شێوە ڕەفتارە کە لەگەڵ مووچە و میللەتی کورد دەکرێت، وەکو لە مانگەکانی پێشوو کردوویانە، لەمەودوا بە ھیچ شێوەیەک قبووڵکراو نییە.

- من ئەمە بە بێڕێزی دەزانم بۆ خوێنی شەھیدان، بۆ خەباتی گەلی کوردستان، بۆ مێژووی پڕ سەروەریی ئەم میللەتە، ئەم میللەتە لە برساندا شۆڕشی نەکردووە. فڵان ئیمزای کرد و ئیمزای نەکرد، ڕەزامەندی دا و ڕەزامەندی نەدا، بۆچی ئێمە دەرۆزەچین لەبەر دەرگەی ئێوە؟

- لێرەوە تۆن و دەنگ و سەنگی گوتارەکەی سەرۆک هەڵدەکشێت بەرەو ئاستێکی باڵای یادەوەری و شانازییەکانی مێژووی خەباتی میللەتێک!. پێناسەیەکی کورت و پوختی قەیرانەکە دەکات و دەیگێڕێتەوە بۆ ناو بازنە و چوارچێوەی کەرامەتی مرۆڤ و لە لیتاوی بەرژەوەندیی تەسکی دارایی ڕزگاری دەکات. 

- بارزانی پەیامێکی ڕاستەوخۆ دەنێرێت بۆ ئەوانەی بە ئەقڵییەتی کوێخایەتی و کەڵەگایی مامەڵە لەگەڵ میللەتی کوردستان دەکەن و پێیان دەڵێت: ئێمە شەریکین لەم عێراقەدا نەک دەرۆزەکەری بەر قاپییی ئێوە!

بۆیە هێشتا بە بەرییەوە ماوە بۆ بەخۆدا چوونەوە و  گۆڕینی تێگەیشتن و هەڵوێست و گوفتار و ڕەفتارتان بە جۆرێک کە هەم برایەتیی نێوانمان بپارێزێت و عێراق بەرەو پێش ببات هەم خەڵکەکەیشی سوودمەندبن لەو سەروەت و سامانە بێ شومارەی لەسەرخاک و ژێرخاکیدایە!

6- " ئێمەش داکوکی دەکەین، دەبێت بێن قەرەبووی ھەموو ئەنفالەکان بدەن، قەرەبووی کیمیابارانی ئەم میللەتە بکەنەوە، قەرەبووی ئەو چوار هەزار و 500 گوندە بکەنەوە. ئەمە حەقی میللەتی کوردە لەسەر ئەوان". 


- لێرەدا گوتارەکە لە ئاستی بەرگرییەوە هەڵدەکشێت بۆ ئاستی داواکارییە مێژووییە ڕێک و ڕەوانەکانی میللەتێکی غەدرلێکراوی ماف زەوتکراو. ئاواز و ڕیتمی گوتارەکە لەوەدا چەق نابەستێت کە خۆی بە قەیرانێکی هەنووکەییەوە خەریک بکات، بەڵکو سەرنجەکان دەگوازێتەوە بەرەو ئاڕاستەی زیندووکردنەوەی دۆسیە هەستیارەکانی چارەنووس و قەرەبووی ئەنفالکراوان و مافی زەوتکراوی دەیان هەزار شەهیدی دەستی دەوڵەتی عێراق، هەزاران گوندی خاپورکراو بە تۆپ و تەیارەی دەوڵەتی عێراق.

- سەرۆک لەدەرگەی دەوڵەتی عێراق دەدات و دەڵێت: " ئەگەر ئێمە بەشێکین لە عێراق، نابێت ئەم یارییە ناشیرینە لەگەڵ ڕزقی خەڵکی کوردستان بکەن، خۆ ئەگەر بەشێکیش نین لە عێراق پێمان بڵێن". سەرۆک بارزانی بەم بڕگەیەی گوتارەکەی قەیرانی نێوان هەولێر و بەغدا لە چوارچێوەی تابلۆیەکی گەورەتردا دەخاتە ڕوو : { تابلۆی شکستی یەکخستنی نیشتمانی و مامەڵەی ڕەگەزپەرستانە لەگەڵ نەتەوی کورد دا }.

 ئەمەش لە چوارچێوەنانێکی مەبەستدار و ڕێگەخۆشکەرە بۆ هەر بژاردە و بڕیارێکی سیاسیی چارەنووسساز لە ئایندەدا.

پوختەی شیکارییەکە:

- گوتارەکەی سەرۆک بارزانی تەنیا کاردانەوەیەک نەبوو لە بەرامبەر دواخستنی مووچەی مووچەخۆرانی هەرێمی کوردستان لەلایەن بەغداوە، بەڵکو زەمینەسازییەکە بۆ پتەکردنی جێگە و پێگەی سیاسیی کورد لە ڕووبەڕووبوونەوە لەگەڵ بەغدایەکدا کە جەوهەری فیدڕاڵیزمی پووچەڵکردۆتەوە.

- گوتارێکە لەپێناو هۆشیارکردنەوە و ئاشناکردنی خەڵکی کوردستان بە حەقیقەتی قەیرانەکان. گوتارێکە پشت بەستوو بە بنەماکانی دەستووری عێراق و پێداگر لەسەر مێژووی خەبات و بەردەوامیی نادادپەروەری بەرامبەر بە کورد لە عێراقی کۆن و نوێدا. پەیامێکی ڕاشکاو ڕاستەوخۆیە بۆ بەغدا: ئیتر بەسە پووچەڵکردنەوەی فیدڕاڵیزم ڕابگرن.

- لە نێوان پابەندبوونێکی ڕاستەقینە بە دەستوور یان هەڵوەشاندنەوەی قەوارەی سیاسیی دەوڵەتی عێراق، یەکێکیان هەڵبژێرن!.