ماڵێک بۆ ژنانی بێ لانە دەکرێتەوە

ئاڤا نیوز

وەزارەتی کار و کاروباری کۆمەڵایەتیی حکومەتی هەرێمی کوردستان ماڵێک بۆ ژنانی بێ لانە 'ئەو ژن و کچانەی شوێنی حەوانەوەیان نییە و لە خێزانەکانیان دابڕاون و هەڕەشە لەسەر ژیانیان نییە' دەکاتەوە کە مەبەستی لێی شیاندنەوەی ئافرەتانە لە ماڵێکی ئارام و شایستە بۆ تێکەڵکردنەوەیان لەگەڵ کۆمەڵگە.

 

زانیاریی تایبەت: ئاڤا زانیویەتی بەڕێوەبەرایەتیی گشتیی چاودێری و گەشەپێدانی کۆمەڵایەتی لە هەر چوار پارێزگاکە و چوار ئیدارە سەربەخۆکەی هەرێمی کوردستان، سەرپەرشتی کردنەوەی ماڵی ژنانی بێ لانە لە شارەکانی؛ هەولێر، سلێمانی، دهۆک، هەڵەبجە، سۆران، کەلار، ڕانیە و زاخۆ، دەکەن و سەرجەم فەرمانبەرانی ناو ماڵی حەوانەوە لە ڕەگەزی مێ دەبن.

 

لێدوانی فەرمی: ئاڤا پەیوەندی بە لایەنی فەرمیی وەزارەتی کاروکاروباری کۆمەڵایەتی کرد بەڵام ئامادە نەبوون هیچ ڕوونکردنەوەیەک لەسەر ئەو بابەتە بدەن.

مەرجەکانی وەرگرتنی ئافرەتان و کچان لەو ماڵە چین؟

- لیژنەیەکی تایبەتمەند بڕیار دەدات.

- هیچ دۆسیە و کێشەیەکی یاساییان نەبێت.

- تەمەنی ژنان لەنێوان 18 تاوەکو 55 ساڵ بێت.

- هەڵگری ڕەگەزنامەی عێراقی بن.

- هیچ هەڕەشەیەک لەسەر ژیانیان نەبێت

- تێوەنەگلابێت لە کاری بەدڕەوشتی و لەشفرۆشی.

- نەخۆشی دەروونی یاخود گوێزراوەی نەبێت و ئاڵوودەی ماددە هۆشبەرەکان نەبێت.

مەرجەکانی مانەوە لە ماڵی حەوانەوە چین؟


- دۆزینەوەی لانەیەکی گونجاو لەلایەن ئافرەتەکە.

- ئەگەر منداڵی هەبێت، منداڵەکەی هەر لەلای خۆی دەمێنێتەوە، بەڵام ئەگەر منداڵەکەی کوڕ بێت، ئەوا تاوەکو تەمەنی 6 ساڵی لەلای دەمێنێتەوە.

- سەرپێچی یاسا و ڕێنماییەکانی ماڵی ژنانی بێ لانە بکات، دەردەکرێت.