ئایدن مەعروف: وەک حزبێکی سەربەخۆ بەشداری هەڵبژاردن دەکەین

ئاڤا نیوز

ئەندامێکی مەکتەبی سیاسی بەرەی تورکمانی، ڕایگەیاند، بەرەی تورکمانی بۆ ئەمساڵ وەک پارتێکی سەربەخۆ بەشداری لە پڕۆسەی  ‌هەڵبژاردنەکان دەکات.

وێنە گەورەکە: دوای ئەوەی دادگەی فیدراڵی عێراق، لیستی کۆتاکانی پەرلەمانی کوردستانی هەڵوەشاندەوە، بەرەی تورکمانی بڕیاریدا وەک حزبێکی سەربەخۆ بەشداری هەڵبژاردنی خوولی شەشەمی پەرلەمانی کوردستان بکات.

لێدوانی فەرمی: ئایدن مەعروف، ئەندامی مەکتەبی سیاسی بەرەی تورکمانی بۆ ئاڤا نیوز گوتی: بۆ ئەمساڵ بەرەی تورکمانی عێراق لە هەولێر و سلێمانی، تایبەت لە هەولێر  وەک پارتێکی سەربەخۆی تورکمان لە هەڵبژاردنەکان بەشداری دەکەین.

زانیاریی زیاتر: هیچ جۆرە هاوپەیمانیەتییەک لەگەڵ حزبەکانی دیکەی تورکمانی نابەستین، چونکە زۆر هەوڵمان داوە و نەگەیشتووین بە هیچ رێککەوتنێک، بۆیە سەربەخۆ دەچینە نێو رکابەری بەدەستهێنانی کورسی تورکمانەکان لە پەرلەمانی کوردستان و لە ماوەیەکی نزیکدا ناوی کاندیدەکان    ئاشکرا دەکەین.

ئەوەی پێویستە بیزانیت: بە بڕیاری نێچیرڤان بارزانی سەرۆکی هەرێمی کوردستان، لە بەرواری 10-6-2024 پڕۆسەی هەڵبژاردنی خوولی شەشەمی پەرلەمانی کوردستان بەڕێوەدەچێت.

باکگراوند: لە 21 ی شووباتی ئەمساڵ، دادگەی فیدراڵی عێراق 11 کورسی کۆتاکانی کریستیان، تورکمان و ئەرمەنی لە پەرلەمانی کوردستان هەڵوەشاندەوە و ژمارەی کورسییەکانی بۆ 100 کورسی کەمکردەوە.