ترەمپ: بەبێ کۆبوونەوەی من و پووتین چاوەڕوانی کۆتاییهاتنی جەنگ مەکەن

ئاڤا نیوز

 

سەرۆک و وەزیری دەرەوەی ئەمریکا ڕایدەگەیێنن، بەبێ کۆبوونەوەی ڕووسیا و ئەمریکا لە ئاستی سەرۆکەکاندا هیچ بڕیارێکی یەکلاکەرەوە نادرێت.

 

وێنە گەورەکە: کۆبوونەوەی وەفدە دیپلۆماسیەکانی نێوان ڕووسیا و ئەمریکا و لە دوایین جاریشدا کۆبوونەوەی وەفدەکانی ڕووسیا و ئۆکراینا لە ئیستەنبووڵ هیچ ئەنجام و پێشکەوتنێکیان بە ئاراستەی کۆتاییهاتنی جەنگی نێوان ڕووسیا و ئۆکراینا بەدینەهێناوە. هەوڵەکانی ئەوروپا و ئەمریکا بە ئاراستەی ناچارکردنی ڕووسیا و ئۆکراینایە بۆ ڕاگرتنی جەنگ، دوایین لووتکەی وڵاتانی ئەوروپاش کە ڕۆژی هەینی لە ئەلبانیا بەڕێوەچوو، بڕیاری دەستپێکردنی ئامادەکارییەکانی بۆ سەپاندنی گەڕێکی نوێی سزاکان بەسەر ڕووسیادا دەرکرد.

 

لێدوانی فەرمی: دۆناڵد ترەمپ، سەرۆکی ئەمریکا لە وەڵامی پرسیاری ڕۆژنامەنوساندا سەبارەت بە کۆتاییهاتنی جەنگی ڕووسیا و ئۆکراینا ڕایگەیاند: "کۆبوونەوەی وەفدەکان هەنگاوێکی ئەرێنییە، بەڵام بەبێ کۆبوونەوەی من و پووتین چاوەڕوانی هیچ بڕیارێکی یەکلاکەرەوە بۆ ڕاگرتنی جەنگ مەبن.”

 

لەلایەکی دیکەوە: مارکۆ ڕۆبیۆ، وەزیری دەرەوەی ئەمریکا دوای ئەنجامدانی پەیوەندییەکی تەلەفۆنی لەگەڵ سێرگی لاڤرۆڤ، وەزیری دەرەوەی ڕووسیا بە میدیاکانی ڕاگەیاند: ”ئایا یاریمان پێ دەکەن؟! دەمانەوێت بزانین. نابێت مۆسکۆ و کیێڤ بەمشێوەیە کات بە فێڕۆ بدەن، دەبێت بە زووترین کات ئەم جەنگە وێرانکەرە بوەستێنین، سەرۆک ترەمپ بە ئاشکرا داوای کۆبوونەوەی لە سەرۆک پووتین کردووە و کۆبوونەوەی هەردوو سەرۆک تاکە ڕێگەچارەیە بۆ کۆتاییهێنان بە جەنگ."