بۆچی تیروپشک بۆ دابەشکردنی زەوی ناکرێت؟ ئاڤا هۆکارەکەی ئاشکرا دەکات

ئاڤا نیوز

نزیکەی ساڵێکە هەنگاوەکانی پرۆسەی دابەشکردنی زەوی دەستیپێکردووە و تاوەکو ئێستا دەیان هەزار کەس ناویان بۆ وەرگرتنی زەوی گەڕاوەتەوە، بەڵام چەند هۆکارێک پڕۆسەی دابەشکردنی زەوییەکانی خاو کردووەتەوە و ئاڤاش هۆکارەکان ئاشکرا دەکات.

 

وێنە گەورەکە: نزیکەی ساڵێکە هەنگاوەکانی پرۆسەی دابەشکردنی زەوی لە هەرێمی کوردستان دەستیپێکردووە، تاوەکو ئێستا وردبینی و پێداچوونەوە بە فۆڕمی زیاتر لە 350 هەزار فەرمانبەر و پێشمەرگە و خانەنشیندا کراوە بۆ سوودمەندبوون لە پرۆسەکە و ڕەزامەندیشیان لە ئەنجوومەنی وەزیران گەڕاوەتەوە، بەڵام تاوەکو ئێستا نزیکەی 25 هەزار پارچە زەوی دابەشکراون و ئەوانی دیکە تەنیا ناویان بۆ وەرگرتنی زەوی گەڕاوەتەوە.

 

ئەوەی پێویستە بیزانیت: تاوەکو ئێستا تەنیا لە هەولێر، سلێمانی، دهۆک، زاخۆ و ئاکرێ زەوی دابەشکراون، لە سنووری هەڵەبجە، گەرمیان، سۆران و ڕاپەڕین هێشتا پرۆسەکە دەستی پێنەکردووە.

 

لێدوانی فەرمی: خەسرەو ئیسماعیل، بەڕێوەبەری گشتیی شارەوانییەکانی سۆران لەبارەی هۆکاری دەستپێنەکردنی دابەشکردنی زەوی لە سنوورەکەیان گووتی، "22 هەزار و 500 فۆڕممان بۆ گەڕاوەتەوە و تەنیا نزیکەی شەش هەزار پارچە زەویمان ئامادەیە، بەهۆی هەڵکەوتەی جوگرافی ناوچەکەمان کە شاخاوییە زەوی کەممان لەبەردەستە و ڕەنگە نەتوانین بەگوێرەی پێویست زەوی دابین بکەین".

 

لەلایەکی دیکەوە: سەربەست مەولوود، سەرپەرشتیاری تیمی وردبینیی پرۆسەی دابەشکردنی زەوی له‌ وه‌زاره‌تی شاره‌وانی فەرمانبەران دڵنیا دەکاتەوە کە هەر کەسێک ناوی دەربچێت زەوی پێ دەدرێت، لە بارەیەوە بە ئاڤا میدیای ڕاگەیاند، "هەر فەرمانبەرێک فۆڕمەکەی پەسەند کرابێت، زەوی وەردەگرێت، ئەگەر لەو شوێنەش نەبێت کە کارتی زانیارییەکەی سەر بەوێيە، لەنزیکترین شارەوانی سنوورەکە زەوی بۆ دابین دەکرێت."

 

هۆکارەکانی وەستانی پرۆسەکە چییە؟

1.بەشێکی زۆر جوتیاران ناڕازین لە گۆڕینی ڕەگەزی زەوییەکانیان لە کشتوکاڵییەوە بۆ ناوچەی نیشتەجێبوون، وێڕای ئەوەی قەرەبوو دەکرێنەوە.

2. هەڵکەوتەی جوگرافی ناوچەکان، بۆ نموونە ئیدارەی سۆران ناوی زیاتر لە توانای دابینکردنی زەوی بۆ گەڕاوەتەوە، ئەمەش پرۆسەکەی وەستاندووە.

3. یەکێک لە سەرەکیترین هۆکارەکان مەرجی کارتی زانیارییە بۆ وەرگرتنی زەوی، بۆ نموونە هەزاران هاونیشتمانی لە دەرەوەی ناوچەکانی خۆیان نیشتەجێن و کارتی زانیارییان سەر ناوچەی خۆیانە لەبری شوێنی نیشتەجێبوون لە ناوچەی خۆیان زەوی وەردەگرن.

4. بەشێکی زۆری شارەوانییەکان چاوەڕێی تەواوبوونی پرۆسەی وردبینی دەکەن، بۆ ئەوەی بەپێی خاڵی زیاتر بەشێکی زەوییەکان دابەش بکەن، لە قۆناغەکانی دواتر زەوی بۆ ئەوانەی دیکە دابین بکەن.