فوئاد حوسێن بە سەردانێکی فەرمی گەیشتە تاران

ئاڤا نیوز

بە مەبەستی بەشداریکردن لە کۆڕبەندی "دیالۆگی تاران"، جێگری سەرۆکوەزیران و وەزیری دەرەوەی عێراق بە سەردانێکی فەرمی گەیشتە تاران.

وێنە گەورەکە: كۆڕبه‌ندى دیالۆگی تاران كه‌ لەلایەن ناوه‌ندى لێكۆڵينه‌وه‌ى سياسى و نێوده‌وڵه‌تيى سه‌ر به‌ وه‌زاره‌تى ده‌ره‌وه‌ى كۆمارى ئيسلاميى ئێرانەوە ڕێکخراوە، 53 وڵات میوانداری کراون، لەسەر ئاستی هەرێمی کوردستانیش نێچیرڤان بارزانی، سەرۆکی هەێمی کوردستان لە کۆڕبەندەکە بەشدارە.

چیرۆکی سەرەکی: ئێوارەی ڕۆژی یەکشەممە 18-5-2025، فوئاد حوسێن، جێگری سەرۆکوەزیران و وەزیری دەرەوە گەیشتە تارانی پایتەختی ئێران و لە فڕۆکەخانەی مهرئاباد لەلایەن بریکاری وەزارەتی دەرەوەی ئێران بۆ کاروباری ڕۆژهەڵاتی ناوەڕاست و کەنداو پێشوازیی لێکرا.

ڕاگەیێنراوی فەرمی: بەگوێرەی ڕاگەیێنراوی وەزارەتی دەرەوەی عێراق لە ماوەی سەردانەکەیدا، وەزیری دەرەوە چاوی بە ژمارەیەک لە بەرپرسە باڵاکانی کۆماری ئیسلامی ئێران دەکەوێت، بۆ تاوتوێکردنی پەیوەندییە دووقۆڵییەکانی نێوان هەردوو وڵات و گفتوگۆکردن لەسەر پرسە هەرێمی و نێودەوڵەتییەکان کە جێگەی بایەخی هەردوولایە.

- بڕیارە فوئاد حوسێن بەشداری لە دانیشتنەکانی ئەم کۆڕبەندە بکات کە چەندین وەزیر و بەرپرسی دیاری وڵاتانی ناوچەکە و جیهان لەگەڵ سەرۆکی سەنتەرەکانی توێژینەوە و پسپۆڕانی نێودەوڵەتی میوانداری کراون، بە ئامانجی گفتوگۆکردن لەسەر چۆنیەتی پتەوکردنی ئاسایشی هەرێمی و هاوکاری هاوبەش و گۆڕینەوەی بیروڕا سەبارەت بە ئاستەنگە سیاسی و ئابوورییەکانی بەردەم ناوچەکە.