ئۆجەلان: لە پرسی برایەتی پێویستمان بە ڕێککەوتنێکی نوێ هەیە

ئاڤا نیوز

جارێکی دیکە شاندی ئیمراڵی چوونە زیندانی ئیمراڵی و لەگەڵ عەبدوڵڵا ئۆجەلان کۆبوونەوە، لە میانی کۆبوونەوەکەیان عەبدوڵڵا ئۆجەلان ڕایگەیاند، لەسەر پرسی برایەتی، پێویستمان بە ڕێککەوتنێکی نوێ هەیە.

وێنە گەورەکە: دوای کۆبوونەوەی لەگەڵ شاندی ئیمراڵی، پەیامی نوێی عەبدولڵا ئۆجەلان، ڕێبەری زیندانیکراوی پەکەکە لەلایەن دەم پارتییە بڵاوکرایەوە، لە پەیامەکەدا جەخت لە برایەتی کورد و تورک دەکات.

بڵاوکراوەی فەرمی: دەم پارتی بڵاویکردەوە، عەبدوڵڵا ئۆجەلان ڕایگەیاندووە، "پێویستمان بە ڕێککەوتنێکی نوێ لەسەر پرسی برایەتی هەیە. ئەوەی ئێمە دەیکەین نوێنەرایەتیی گۆڕانکارییەکی گەورە دەکات".

- سروشتی پەیوەندیی کورد و تورکیا تەواو جیاوازە، ئەوەی زیانی پێدەگات پەیوەندیی برایەتییە، برا شەڕ دەکات، بەڵام یەکێکیان بەبێ ئەوی تریان بوونی نییە. "ئێمە خەریکی پاککردنەوەی یەک بە یەکی ئەو تەڵە و مینانەین کە زیان بەم پەیوەندییە دەگەیێنن و چاککردنەوەی ئەو ڕێگا و پردانەی کە زیانیان بەرکەوتووە.

- پەشیمانم کە بۆ دواجار لەگەڵ سری سورەیا ئۆندەر قسەم نەکرد، یادەوەرییەکی بەنرخی هەیە، پێویستە بە زیندوویی بیهێڵینەوە.

ئەوەی پێویستە بیزانیت: بۆ جاری پێنجەم شاندی دەم پارتی لەبارەی پرۆسەی ئاشتی لە تورکیا و باکووری کوردستان سەردانی ئیمراڵییان کرد. دوایین جاریش، ڕۆژی دووشەممە، 21ـی مانگی چواری 2025، بوو.