نەتانیاهۆ: گەر پێشنیازەکانی ویتکۆڤ جێبەجێبکرێت جەنگ کۆتایی پێدێت

ئاڤا نیوز

سەرۆکوەزیرانی ئیسرائیل دانوستاندنەکانی دەوحە کە تێیدا دەستپێشخەری و پێشنیازەکانی ستیڤ ویتکۆڤ تاوتووێ دەکرێت بە دەرفەتێکی بەهێز ناوزەند دەکات بۆ کۆتایهێنان بە جەنگ.

وێنە گەورەکە: گەڕێکی دیکەی دانوستاندنە ناڕاستەوخۆکانی نێوان ئیسرائیل و حەماس بە نێوەندگیری میسر و قەتەر و پشتگیری ئەمریکا دەستی پێکردەوە، ڕۆژی شەممە یەکەم کۆبوونەوە ئەنجمادرا، دۆناڵد ترەمپ، سەرۆکی ئەمریکا ڕایگەیاند چاوەڕوانی ئەنجامی ئەرێنی لەم گەڕەی دانوستانەکان دەکات و دەیەوێت بە زووترین کات ئاگربەستی هەمیشەیی ڕابگەیەنرێت و کۆتایی بە جەنگ بهێنرێت.

بڵاوکراوەی فەرمی: نوسینگەی بنیامین نەتانیاهۆ، سەرۆکوەزیرانی ئیسرائیل لە بڵاوکراوەیەکی فەرمیدا ڕایگەیاند: وەفدی دانوستانەکان هەموو هەوڵێک دەدەن بۆ قۆستنەوەی دەرفەتەکان بۆ کۆتایهێنان بە جەنگ، ناوەڕۆکی کۆبوونەوەکان لەسەر بنەمای پێشنیازەکانی ستیڤ ویتکۆڤ، نێردەی تایبەتی سەرۆکی ئەمریکا بەڕێوەدەچێت، ئەم قۆناغەی دانوستانەکان بە دەرفەتێکی بەهێز دەبینین بۆ کۆتایهێنان بە جەنگ و گەر پێشنیازەکانی ویتکۆڤ جێبەجێبکرێت جەنگ کۆتایی پێدێت.

پێشنیازەکانی ستیڤ ویتکۆڤ، بۆ کۆتایهێنان بە جەنگ لە غەززە

٠ ئازادکردنی تەواوی بارمتەکان

٠ دوورخستنەوەی سەرکردە و چەکدارانی حەماس لە کەرتی غەززە

٠ داماڵینی کەرتی غەززە لە چەک

٠ بوونیادنانەوەی غەززە

لەلایەکی دیکەوە: بزووتنەوەی حەماس لە ڕاگەیەنراوێکدا نیازی ئیسرائیلی بۆ کۆتایهێنان بە جەنگ ڕەتکردەوە ڕایگەیاند: ئیسرائیل بەبێ هیچ هەنگاوێکی ئەرێنی کۆمەڵێک داواکاری قورسی پێشکەشکردووە، بەم شێوەیەش تەنیا دەیەوێت کات بە فیڕۆ بدات و بەردەوامی بە جەنگ بدات.