دوایین ڕێککەوتنی ئەتۆمی نێوان ئەمریکا و ڕووسیا بەرەو کۆتایی دەچێت

ئاڤا نیوز

دوایین پەیماننامەی کۆنتڕۆڵکردنی چەکە ئەتۆمییەکانی نێوان ئەمریکا و ڕووسیا ناسراو بە "نیو ستارت" (New START)، لە ڕێکەوتی 5-2-2026 بەسەردەچێت و تائێستا هیچ ئاسۆیەکی ڕوون بۆ نوێکردنەوەی لە ئارادا نییە. 

وێنە گەورەکە: بەسەرچوونی ئەم ڕێککەوتنە جیهان دەخاتە بەردەم مەترسیی پێشبڕکێیەکی نوێی و بێ سنووری چەکداریی؛ "نیو ستارت" تاکە بەربەستی یاسایی بوو کە ڕێگریی لە واشنتن و مۆسکۆ دەکرد جبەخانە ئەتۆمییەکانیان فراوان بکەن.

زانیاریی زیاتر: پەیماننامەی نیو ستارت لە ساڵی 2010 لەلایەن باراک ئۆباما و دیمیتری مەدڤێدێڤ واژۆ کرا و لە ساڵی 2011ـەوە چووە بواری جێبەجێکردنەوە. ئەم ڕێککەوتنە کە لە ساڵی 2021 بۆ جارێکی دیکە نوێکرایەوە، سنووری بۆ ژمارەی کڵاوە ئەتۆمییەکانی هەردوو وڵات داناوە.

لەلایەکی دیکەوە: ئێستا ڕووسیا پێشنیازی درێژکردنەوەی ڕێککەوتنەکەی بۆ ماوەی 1 ساڵ کردووە تاوەکو بوار بۆ گفتوگۆ هەبێت، بەڵام ئیدارەی دۆناڵد ترەمپ دەیەوێت پەیماننامەیەکی "باشتر" واژۆ بکات کە چینیش وەک جەمسەرێکی نوێی ئەتۆمیی بگرێتەوە. واشنتن پێیوایە هەر ڕێککەوتنێک بەبێ بەشداریی پەکین، ناتوانێت هاوسەنگیی ئەمنیی جیهانیی بپارێزێت، کە ئەمەش پڕۆسەی نوێکردنەوەی ڕێککەوتنە کۆنەکەی ڕووبەڕووی بنبەست کردووەتەوە.

باکگراوند: پەیماننامەی "ستارت" مێژووەکەی بۆ سەردەمی جەنگی سارد دەگەڕێتەوە، بەڵام جۆری "نیو ستارت" نوێترین ڤێرژنی بوو بۆ کەمکردنەوەی مەترسیی پێکدادانی ئەتۆمیی.