ئاکپارتی بۆ ئاڤا: کەسانێک هەن هەوڵدەدەن پرۆسەی ئاشتیی ژەهراوی بکەن

ئاڤا نیوز

فاروق کڵچ، پەرلەمانتاری ئاکپارتی بە ئاڤای ڕاگەیاند، کەسانێک هەن دەیانەوێت پرۆسەی ئاشتی ژەهراوی بکەن، زانیاری و هەواڵی ناڕاست بڵاودەکەنەوە کە دەبێتە هۆی زیان گەیاند بە پرۆسەکە. 

 

چیرۆکی سەرەکی: ئەم قسانەی کڵچ دوای ڕاگەیاندنی چەکدانانی پەکەکە دێت و میدیاکانی تورکیا بەشێوازی جیاواز قسە لەسەر هەنگاوە کردارییەکانی ئەو پرۆسەیە دەکەن، کڵچ پێوایە کە ئەمە زیان بە پرۆسەکە دەگەیەنێت. 

 

لەلایەکی دیکەوە: عومەر فاروق، گەرگەریلیئۆغلو، پەرلەمانتاری دەم پارتی بە ئاڤای ڕاگەیاند، پرۆسەکە ئەرێنی بەڕێوە دەچێت، بەڵام قورس بەرەو پێش دەچێت، لەبەر ئەوەی مەترسی هەیە لەسەر تێکدانی پرۆسەکە. 

 

- عەبدوڵڵا ئۆجەلان، خواستێکی ڕاستەقینەی هەیە بۆ چەک دانانی پەکەکە، هەروەها ئەو ڕێکخراوەش هەر جددییە لە هەنگاوەکانی بۆ پڕۆسەی ئاشتی. 

لەلایەکی دیکەوە: محەممەد کەماچ، پەرلەمانتاری دەم پارتی گوتی: پرسی هەڵوەشاندنەوەی  پەکەکە خاڵی کۆتایی بۆ دانراوە، پەکەکە کۆتایی بە شەڕی شاخ هێنا، ئێستا تۆپ لە گۆرەپانی دەسەڵات دایە و کاتی ئەو هاتووە کە لە پەرلەمانی تورکیا قسە لەسەر مافە دەستوورییەکانی کورد بکرێت. لێرە بەدواوە کورد، تەنیا لە پەرلەمان شەڕی خۆی دەکات. 

- چاوەڕێ دەکرێت لیژنەیەکی 100 کەسی لە پەرلەمانی تورکیا پێکبهێنرێت، ئەو لیژنەی کار بۆ ڕێکخسنتەوەی دەستوور و داواکارییەکانی مافی کورد بکات.   

دەم پارتیی دەڵێت، لێر بەدواوە کارمان بە چۆنیەتی ڕادەست کردنەوەی چەک و ئەمانە نییە، ئەوەی بەدەسەڵات دەیویست خۆهەڵوەشاندنەوەی پەکەکە بوو، ئیتر پەکەکە یەک فیشەکیش ناتەقێنێت، لێرە بەدواوە ئەرکی ئێمە لە پەرلەمان دەبێت.

 

 

زانیاریی زیاتر: ئاڤا زانیویەتی ئێستا میکانیزمی چەکدانانی پەکەکە لەبواری جێبەجێکردن دایە، بەڵام دەسەڵاتدارانی پەکەکە لە قەندیل بەهەموو شێوەیەک هەنگاوەکانیان بە نهێنی هێشتووەتەوە، بۆ ئەوەی کەسانی هەلپەرست زیان بە پرۆسەکە نەگەیەنن.