ترەمپ و پووتین لەبارەی جەنگی ئۆکراینا دوو کاتژمێر بە تەلەفۆن قسە دەکەن

ئاڤا نیوز

ترەمپ هەوڵەکانی چڕ دەکاتەوە بۆ ڕاگرتنی جەنگ لەنێوان ئۆکراینا و ڕووسیا و دەڵێ، "تا خۆم نەیەمە سەر هێڵ و قسە لەگەڵ پوتندا نەکەم، ئەم جەنگە ناوەستێ".

وێنە گەورەکە: دۆناڵد ترەمپ، سەرۆکی ئەمریکا و ڤلادیمێر پوتین، سەرۆکی ڕووسیا بۆ ماوەی زیاتر لە دوو کاتژمێر پەیوەندییەکی تەلەفۆنیان ئەنجامدا.

لێدوانی فەرمی: دۆناڵد ترەمپ ڕایگەیاند، پەیوەندییە تەلەفۆنییەکەم زۆر بەباشی لەگەڵ پووتین بەڕێوەچوو، ڕووسیا و ئۆکراینا دەستبەجێ دانوستانەکان بەرەو ئاگربەست و لەوەش گرنگتر کۆتایی هاتنی جەنگ دەست پێدەکەن، هەردوولایان لەسەر مەرجەکانیان گفتوگۆ دەکەن، چونکە خۆیان وردەکارییەکان دەزانن.

- ڕووسیا دەیەوێت پەیوەندییەکی بازرگانی گەورەی لەگەڵ ئەمریکا هەبێت کاتێک "ئەم خوێنڕشتنە کارەساتبارە کۆتایی دێت و منیش لەگەڵ ئەوەدام". 

- دەرفەتێکی گەورە بۆ ڕووسیا هەیە کە بڕێک سامانی زۆر و هەلی کار دروست بکات، تواناکانی بێ سنوورە. بە هەمان شێوە ئۆکراینا دەتوانێت سوودمەندێکی گەورە بێت لەسەر بازرگانی، لە پرۆسەی بنیاتنانەوەی وڵاتەکەیدا. 

- "دوای گفتوگۆکانم لەگەڵ پوتین، بە ڤۆلۆدیمێر زێلێنسکی و سەرۆکەکانی وڵاتانی فەرەنسا و ئەڵمانیا و ئیتاڵیا و جۆرجیا و فینلاند و ئەوروپام وت دەبێت دەستبەجێ دانوستانەکانی ڕووسیا و ئۆکراینا دەستپێبکاتەوە، ڤاتیکان ئامادەیی نیشانداوە کە ئارەزوو دەکەن میوانداری دانوستانەکان بکەن".

بۆچوونی لایەنی بەرامبەر: پوتین ڕایگەیاند، پەیوەندییە تەلەفۆنییەکەی لەگەڵ دۆناڵد ترەمپ زیاتر لە دوو کاتژمێری خایاندووە و ڕاشکاوانە و مانادار و زۆر بەسوود بووە.

- "لە پەیوەندییەکەماندا ترەمپ ئاماژەی بەوەکردووە، ڕووسیا لەگەڵ چارەسەری ئاشتییانەی قەیرانی ئۆکراینادایە".

- ڕووسیا ئامادەیە لەگەڵ کیێڤ کار لەسەر یاداشتێک بکات سەبارەت بە پەیماننامەی ئاشتی داهاتوو.

- "پێویستە ڕەگ و ڕیشەی ململانێی نێوان ڕووسیا و ئۆکراینا نەهێڵرێت و ئەگەر هەیە بگەینە ئاگربەست".

- دانوستانەکانی ئیستەنبووڵ جیهان دەخاتە سەر ڕێگەی ڕاست و بەرەو چارەسەرکردنی کێشەکانی ئۆکراینا.