چوارچێوەی هەماهەنگی: پاساوی بوونی سوپای تورکیا لە خاکی عێراق نەماوە

ئاڤا نیوز

 

هاوپەیمانی چوارچێوەی هەماهەنگی لە ڕاگەیێنراوێکدا دەڵێت: ڕێککەوتنی ئاشتیی نێوان تورکیا و پەکەکە، کۆتایی بە پاساوی مانەوەی سەربازانی تورکیا لەسەر خاکی عێراق دەهێنێت. 

 

وێنە گەورەکە: ئێوارەی ڕۆژی دووشەممە، هاوپەیمانیی چوارچێوەی هەماهەنگی 228ەمین کۆبونەوەی ئاسایی خۆی لە نووسینگەی موحسین مەندەلاوی، جێگری یەکەمی سەرۆکی پەرلەمان، بە ئامادەبونی محەممەد شیاع سوودانی، سەرۆکوەزیرانی عێراق ئەنجامدا.

 

ڕاگەیێنراوی فەرمی: لە دوای کۆبوونەوەکە، سەکردەکانی چوارچێوەی هەماهەنگی لە ڕاگەیێنراوێکدا پیرۆزبایی سەرکەوتنی عێراقیان كرد لە میوانداریکردنی لووتکەی کۆمکاری عەرەبی.

 

گۆشەیەکی دیکەی دیمەنەکە: چوارچێوەی هەماهەنگی پێشوازیی لە ڕێککەوتنی تورکیا لەگەڵ پارتی کرێکارانی کوردستان(پەکەکە) کرد، ئاماژەی بەوەش کرد؛ کۆتایی بە پاساوی بوونی تورکیا لە ناو خاکی عێراق دەهێنێت، جەختیش لە گرنگی ڕەنگدانەوەی ئەو هەنگاوەی لەسەر ئاسایشی ناوچە سنورییەکانی نێوان هەردوو وڵات کردەوە.

 

ئەوەی پێویستە بیزانیت: ڕۆژی دووشەممە 12-05-2025، پەکەکە بڕیاری چەکدانانی خۆی ڕاگەیاند، ئەوەش لەسەر بانگەوازی عەبدوڵڵا ئۆجەلان، ڕێبەری زیندانیکراوی پەکەکە.