هاوسەرۆکی پژاک: خۆمان هەڵناوەشێنینەوە و چەک دانانێین

ئاڤا نیوز

 

هاوسەرۆکی پژاک لەبارەی پرۆسەی ئاشتی لە تورکیا و خۆهەڵوەشاندنەوە پەکەکە ڕایدەگەینێت: چەک دانانی پەکەکە پەیوەندیی بە ئەوانەوە نییە و لە خەباتی چەکداریی بەردەوام دەبن.

 

وێنە گەورەکە: لە 12ـی ئایاری 2025، پارتی کرێکارانی کوردستان (پەکەکە) ئەنجامی کۆنگرەی 12ـیان بڵاوکردەوە، تێیدا بڕیاری خۆهەڵوەشاندنەوە و چەکدانانی دا، هەروەها هەموو چالاکی بەناوی پەکەکەوە ڕاگرت، دوای ئەوە چاوەکان لەسەر تورکیا و هەنگاوەکانی دیکەی پرۆسەی ئاشتین لەو وڵاتە.

 
لێدوانی فەرمی: ئەمیر کەریمی، هاوسەرۆکی پارتی ژیانی ئازادی کوردستان (پژاک) لە بەرنامەیەکی تەلەڤزیۆنی کەناڵی (ئاریەن تیڤی) ڕایگەیاند: بانگەوازەکەی عەبدوڵڵا ئۆجەلان هەنگاوێکی جددی و مێژووییە بۆ پرۆسەی ئاشتی، بەڵام خۆهەڵوەشاندنەوەی پەکەکە پەیوەندیی بە ئێمەوە نییە، نە چەکەکانمان دادەنێین و نە خۆمان هەڵدەوەشێنینەوە.

 

گۆشەیەکی دیکەی دیمەنەکە: بنەمای تیکۆشانەکانی پژاک، پێداگرییە لەسەر چارەسەری کێشەکانی کورد لە ئێران، ئێمە لەگەڵ ئەوەداین کێشەی کورد بچێتە نێو سیاسەتەوە و دوورکەوێتەوە لە بەکارهێنانی تووندوتیژی، بەکارهێنانی چەک بۆ خۆپارێزییە و لەپێناو مافێکی ڕەوا دایە. هاوسەرۆکی پارتی ژیانی ئازادی کوردستان (پژاک) وایگوت.

 

ئەمەش بزانە: بە گوتەی ئەمیر کەریمی، بنەمای سیاسەتی پژاک ژیانی هاوبەشە لەگەڵ گەلان بەشێوەیەکی دیموکراتی، ئەوان لە 2011ـەوە ئاگربەستیان ڕاگەیاندووە و ئەگەر هێرشیان لەسەر نەبێت، ئەوان هیچ چالاکییەکیان نابێت.

- بانگەوازەکەی عەبدوڵڵا ئۆجەلان بۆ ئێمە نوێ نییە و شۆکمان ناکات، چونکە دەمێکە خۆمان بۆ ئەمڕۆژە ئامادە کردووە.